काठमाडौ, माघ १० । शिक्षक सेवा आयोगले प्राथमिकदेखि माध्यमिक तहसम्मका लागि साढे १७ हजार शिक्षक माग गर्दा दुई लाखभन्दा बढीले आवेदन दिएका छन् ।
आयोगले प्रावि तहमा १३ हजार दुई सय ९७, निमाविमा दुई हजार ६ सय ६ र माध्यमिक तहमा एक हजार पाँच सय ५२ शिक्षकका लागि विज्ञापन गरेको थियो । त्यसको १२ गुणा बढी आवेदन परेको छ ।
आयोगका सूचना अधिकारी सुदर्शन मरहठ्ठाका अनुसार माध्यमिक तहका लागि ३६ हजार पाँच सय ५२ जनाको निवेदन परेको छ ।
त्यस्तै, निमावि शिक्षकका लािग ८६ हजार नौ सय १४ र प्राविका लागि ९७ हजार २९ आवेदन परेका छन् । प्रावि तहमा आवेदन फारम भर्ने समय अझै चार दिन बाँकी छ । तीन वर्षको अन्तरालमा यति धेरै पदपूर्ति हुन लागेको र शैक्षिक योग्यता बढी भएकाले तल्लो तहमा पनि आवेदन दिएकाले संख्या धेरै भएको हुन सक्ने सूचना अधिकारी मरहठ्ठाको भनाइ छ ।
‘प्राथमिक तहमा पदपुर्ति हुने दरबन्दी धेरै भएकाले पनि उमेरहद बढी नहुँदै सेवामा प्रवेश गर्नेको चाहना धेरै भएको हुन सक्छ,’ उनले भने, ‘धेरै संख्यामा दरबन्दी खुल्दा छनोट हुने सम्भावना धेरै भएकाले आवेदन दिनेको संख्या धेरै भएको हुन सक्छ ।’ सेवा–सुविधा बढ्दै गएकाले शिक्षण पेसाप्रति युवाको आकर्षण बढेको पनि हुन सक्ने उनको बुझाइ छ ।
शिक्षक सेवा आयोगले प्राथमिक तहमा १३ हजार दुई सय ९७ शिक्षक माग गरेको छ । यसमा खुलातर्फ सात हजार दुई सय तीन, आदिवासी जनजातितर्फ एक हजार पाँच सय ९०, मधेसी एक हजार दुई सय ९८, दलित पाँच सय ३०, अपांगता भएका दुई सय ९३ र पिछडिएको क्षेत्रबाट दुई सय ३४ शिक्षक माग गरिएको छ । त्यस्तै, करिब दुई हजार महिला शिक्षकको मागेको छ । जसमा खुलातर्फ एक हजार आठ सय ५४, दलित ६० र मुस्लिम ३० शिक्षक माग गरिएको छ ।
शिक्षक बन्नका लागि अहिलेसम्म सात लाख १७ हजार एक सय पाँच जनाले अध्यापन अनुमतिपत्र लिएका छन् । आयोगका अनुसार माध्यमिक तहमा अध्यापनका लागि एक लाख ४४ हजार तीन सय ८१, निमावि तहका लागि तीन लाख ७० हजार १२ र प्राविका लागि दुई लाख दुई हजार सात सय १२ जनाले अनुमतिपत्र लिएका छन् ।
