काठमाडौ । बोरुसिया डर्टमण्डका सर्वाधिक गोलकर्ता अर्लिङ हालान्ड चोटका कारण मैदानबाहिर बस्नुपर्ने भएको छ । क्लबले उनको मांसपेशीमा समस्या देखिएको जानकारी दिएको छ ।
शनिबार होफनहाइमविरुद्ध जीत हासिल गर्ने क्रममा ६३ औँ मिनेटमा घाइते हुँदै मैदान छाड्न बाध्य भएका थिए ।त्यसअघि खेलमा २१ वर्षीय नोर्वेजियन खेलाडीको दाहिने घुँडामा उपचार गरेर मैदानमा पुनः फर्किएका थिए । तर उनले पुरै खेल खेल्न सकेनन् ।
आइतबार र सोमबार उनको स्वास्थ्य परीक्षण गरिएको थियो । ‘हालान्डको मांसपेशीमा समस्या देखिएको छ र आगामी दिनमा थप परीक्षण र उपचारको आवश्यकता रहेको छ,’ डर्टमण्डले आफ्नो वेबसाइटमा सोमबार जानकारी दिएको छ । यो सिजन मांशपेसीको समस्याका कारण उनले खेल गुमाउनु परेको यो तेस्रो पटक हो ।
यसअघि सेप्टेम्बर र अक्टोबरमा उनले तीन खेल गुमाएका थिए भने अक्टोबर र नोभेम्बरमा पनि उनले सात खेल गुमाएका थिए । यसका बाबजुद उनले यो सिजन १४ बुन्डेस लिगका खेलमा उनले १६ गोल गरिसकेका छन् ।
डर्टमण्डले उनी कति समय मैदान बाहिर रहनुपर्छ भनेर चाहिँ खुलाएको छैन । २० खेलपछि डर्टमण्ड लिगमा दोस्रो स्थानमा रहेको छ । शीर्ष स्थानमा बार्यन म्युनिखभन्दा टोली ६ अंकले पछि रहेको छ ।
