जनकपुरधाम । जनकपुरधाममा मंगलबारदेखि दोस्रो विद्यालयस्तरीय टी–२० क्रिकेट प्रतियोगिता हुन लागेको छ। खेलाडी उत्पादन गर्ने उद्देश्यले राष्ट्रिय निजी तथा आवासीय विद्यालय एशोसिएशन नेपाल (एन प्यावसन) धनुषाले विद्यालय स्त्तरीय दोस्रो रनिङ प्रतियोगिता गर्न लागेको हो।
जिल्ला क्रिकेट संघ धनुषाको सहकार्यमा मंसिर २६ गतेदेखि पुस ८ गते सम्म जनकपुरधाम उपमहानगरपालिका १४ रजौलस्थित निर्माणाधिन रामजानकी बहुउदेश्यीय अन्तराष्ट्रिय रगशालामा हुने प्यावसनका जिल्ला अध्यक्ष तथा क्रिकेट संघका सचिव आशिष झाले जानकारी दिए।
प्रतियोगितामा एन प्यावसनमा आवद्ध १२ विद्यालयले प्रतियोगितामा सहभागिता जनाएको छ। प्रतियोगिता ‘रनिङ कप’ भए पनि कोभिड–१९ महामारीको कारण दुई वर्ष स्थगित भएको थियो। यस वर्षदेखि पुनः प्रतियोगिताले निरन्तरता पाएको छ।
यस प्रतियोगिताबाट स्थानीय स्त्तरबाट खेलाडी उत्पादन हुने उनले विश्वास जनाए। प्रतियोगिताबाट प्रतिभावन खेलाडीको टिम बनाएर प्रशिक्षण दिने तथा १५ जना राम्रा खेलाडीलाई क्रिकेट प्रशिक्षणसहित पढाईको लागि छात्रवृति दिने तयारी रहेको उनले बताए।
खेल आइसीसीको नियमअनुसार हुने जनाइएको छ। प्रत्येक टिमले लिग चरणको दुई म्याच खेलेपछि नकआउट प्रणालीमा प्रतियोगिता हुने छ। प्रतियोगिता विजेता र उपविजेता टिमको लागि आकर्षक कप र प्रमाणपत्र दिनेछन्।
