काठमाडौँ । चालु आर्थिक वर्ष २०८०/८१ चार महिनामा उपभोक्ता मूल्य सूचकाङ्कमा आधारित मुद्रास्फीति ५.३८ प्रतिशत रहेको छ।
यो अवधिमा आयात ३.८ प्रतिशतले घटेको छ भने निर्यात ७.७ बढेको छ। नेपाल राष्ट्र बैंकले सार्वजनिक गरेको आर्थिक वर्ष २०८०/८१ को चार महिनाको तथ्यांकमा आधारित ‘देशको वर्तमान आर्थिक तथा वित्तीय स्थिति’ सार्वजनिक गरेको हो।
शोधनान्तर स्थिति १४७ अर्ब ११ करोडले बचतमा हुँदा कुल विदेशी विनिमय सञ्चिति १,६९६ अर्ब ७८ करोड र अमेरिकी डलरमा १२ अर्ब ७५ करोड रहेको छ।
सार्वजनिक तथ्यांकअनुसार चार महिनामा विप्रेषण नेपाली रुपैयाँ २६.४ प्रतिशतले र अमेरिकी डलरमा २३.१ प्रतिशतले बढेको छ।
नेपाल सरकारको खर्च ३५५ अर्ब ६३ करोड र राजस्व परिचालन २७६ अर्ब ६४ करोड रहेको राष्ट्र बैंकले जनाएको छ। बैंककाअनुसार विस्तृत मुद्रा प्रदाय ३.७ प्रतिशतले बढेको छ। वार्षिक बिन्दुगत आधारमा यस्तो मुद्राप्रदाय १४.२ प्रतिशतले बढेको छ।
यस्तै बैंक तथा वित्तीय संस्थाको निक्षेप संकलन २.७ प्रतिशतले बढेको छ भने निजी क्षेत्रमा प्रवाहित कर्जा २.१ प्रतिशतले बढेको छ। यस्तै वार्षिक बिन्दुगत आधारमा निक्षेपको वृद्धिदर १४.३ प्रतिशत र निजी क्षेत्रमा प्रवाहित कर्जाको वृद्धिदर ४.४ प्रतिशत रहेको छ।
