काठमाडौं । नेपाल सुपर लिग (एनएसएल)को दोस्रो संस्करणमा आज स्पोर्टिङ इलाम डे मेची एफसीले सिजनको अन्तिम खेल खेल्दा सुखद अन्त्यको खोजीमा हुनेछ ।
जारी सिजनको सबैभन्दा रोमाञ्चक टिम बने पनि इलामले हालसम्म एक मात्र जित निकालेको छ । सात खेलबाट पाँच अंकसहित पुछारमा रहेको इलामको अन्तिम–४ को सम्भावना समाप्त भइसकेको छ ।
त्रिपुरेश्वरस्थित दशरथ रंगशालामा हुने दिनको पहिलो खेलमा इलामले लिगकै अपराजित ललितपुर सिटी एफसीको सामना गर्नेछ । तालिकाको तेस्रो स्थानमा रहेको ललितपुरले ६ खेलबाट १० अंक जोडेको छ । आजको खेलमा विजयी भए ललितपुर सेमिफाइनलनजिक पुग्नेछ । खेल दिउँसो १ बजे सुरु हुनेछ ।
आजै हुने दोस्रो खेलमा बुटवल लुम्बिनी एफसी र पोखरा थन्डर्स भिड्दै छन् । यो खेलमा जित निकाले पोखराले अन्तिम–४ को यात्रा लगभग निश्चित गर्नेछ । शीर्ष चारको सम्भावना कायम राख्न बुटवलमाथि भने जितको दबाब छ । दशरथ रंगशालामा नै हुने यो खेल अपराह्न ५ बजे सुरु हुनेछ ।
