मिलन कुमार राई
इलाम । इलामको सूर्योदय नगरपालिकाको करफोक स्कुल को खेल मैदानमा १४ओैं नगर स्तरीय राष्ट्रपति रनिङ शिल्ड छनौट खेलकुद आज एक कार्यक्रमकाबीच समापन भएको छ । गत माघ १० गते सूर्योदय नगर खेलकुद विकास समितिको आयोजनामा शुरु भएको उक्त खेलकुद कार्यक्रम हिजो माघ १२ गते सूर्योदय नगरपालिकाका नगर प्रमुख रण बहादुर राईको प्रमुख आतिथ्यतामा समापन भएको हो ।
सूर्योदय नगर खेलकुद विकास समितिका अध्यक्ष सौरभ आचार्य को सभापतित्व र इलाम जिल्ला खेलकुद विकास समितिका अध्यक्ष खगेन्द्र बास्तोलाको विशेष आतिथ्यतामा सम्पन्न कार्यक्रममा सूर्योदय नगरपालिकाका १७ वटा विद्यालयका विद्यार्थीहरुको सहभागिता रहेको थियोे ।
जम्मा ३० वटा विधामा गराइएको छनौट प्रतियोगितामा १४ स्वर्ण, ४ रजत र ४ कास्य सहित करफोक मावि प्रथम, ८ स्वर्ण, ४ रजत र ४ कास्य सहित कृष्णाश्रम मावि द्वितीय र ३ स्वर्ण, ७ रजत र ५ कास्य पदक सहित फिक्कल नमुना माविले तृतीय स्थान हासिल गरेका छन् । जिल्ला भर छनौट प्रतिस्पर्धा सम्पन्न भए पश्चात् आगामी फागुनमा जिल्ला स्तरीय प्रतिस्पर्धा सम्पन्न हुने जिल्ला खेलकुद विकास समितिका अध्यक्ष खगेन्द्र बास्तोलाले जानकारी दिए ।
