इलाम । न्युपी थर्पी छोलिङ गुम्बा निर्माण सहयोगार्थ हिजो सूर्योदय नगरपालिका १२ को करफोक स्कुल खेल मैदानमा भव्य कार्यक्रम सम्पन्न भएको छ । नेपालकै चर्चित ब्याण्ड नेपथ्यले उक्त गुम्बाको सहयोगका लागि आफ्नो प्रस्तुति दिएको हो । कार्यक्रममा उपस्थित मिडियाकर्मीहरुले सो कार्यक्रमको लाइभ भिडियो हाल्न नपाएपछि शुरुआतमा केही असामञ्जस्यता देखिएको थियो । यसैबीचमा इलाम ग्रीन पेजले त असन्तुष्टि जनाउदै आफ्नो पेजमा पोष्ट नै गरेको थियोे उक्त पोष्ट अहिले हटाइएको छ ।
कार्यक्रम हेरिसके पश्चात अग्रज पत्रकार केदार शर्मा आफ्नो फेसबुक वालमा लेख्छन् -“हिजो इलामको करफोक स्कूलमा भएको नेपथ्यको कन्सर्ट ५०००+ दर्शकले हेरे (स्रोत: आयोजक), र स्वाभाविक हो, ती सबैजसो युवा थिए। रु ११००/- को टिकट काटेर कन्सर्ट हेर्न आएका गाउँघरका युवाको उत्साहपूर्ण उपस्थितिले भन्छ, गाउँघर रित्ता छैनन्। म्यानपावरका अफिस र एयरपोर्टको डिपार्चर लाउन्जमा मात्र हेरेर निराशा पोख्ने महानुभावहरूलाई उनीहरूको सन्देश छ, हामीलाई भेट्ने भए गाउँमा पनि पस!”
कार्यक्रमका आयोजकले कार्यक्रमको आधिकारिक हरहिसाब सार्वजनिक त गरेको छैन तर आयोजकको दावी अनुसार ५ हजार भन्दा बढी दर्शकले कन्सर्ट हेरे । भिआइपी टिकटलाई छोडेर सामान्य टिकटको मात्रै हिसाब गर्ने हो भने ५ करोड ५० लाख रुपैया आम्दानी भएको देखिन्छ । व्याण्ड खर्च र अन्य व्यवस्थापन खर्च समेत कटाएर कार्यक्रमबाट आयोजकले ठुलो राशि बचाउने विश्वास गरिएको छ भने गुम्बा निर्माण गर्ने उदेश्यसमेत सहजै पूरा हुने देखिन्छ ।
कन्सर्ट हेर्न इलाम, झापा, पाँचथर र भारतको मिरिक, दार्जिलिङ आसपास लगायतका क्षेत्रहरुबाट संगीत पारखीहरुको उपस्थिति रहेको थियोे ।
