स्टकहोम / अफ्रिकी महादेशबाहिर एमपक्सको थप सङ्क्रामक भ्यारिएन्टको पहिलो सङ्क्रमण पुष्टि भएको छ । स्वीडेनको जनस्वास्थ्य एजेन्सीले बताएअनुसार सङ्क्रमित व्यक्ति अफ्रिकामा बस्दा एमपक्सको चपेटामा आएका हुन् । अफ्रिकाका केही भागमा समेत फैलिएपछि विश्व स्वास्थ्य संगठन (डब्ल्यूएचओ)ले हालै मात्र एमपक्सलाई सार्वजनिक स्वास्थ्य आपत्काल घोषणा गरेको थियो ।
डब्ल्यूएचओले यो रोगलाई अन्तर्राष्ट्रिय चिन्ताको विषय बताएको छ । स्वीडेनको जनस्वास्थ्य एजेन्सीका कार्यवाहक प्रमुख ओलिभिया विग्जेलका अनुसार अन्य व्यक्तिमा सङ्क्रमणको जोखिम कम गर्न सकियोस् भनेर सङ्क्रमित व्यक्तिले स्टकहोममा उपचार गराउन आग्रह गरेका थिए ।
डब्लुएचओका प्रमुख टेड्रोस अधानोम गेब्रेयससले अफ्रिका र सो क्षेत्रभन्दा बाहिर पनि यो रोग फैलिने सम्भावनाप्रति चिन्ता व्यक्त गरेका थिए । एमपक्स सङ्क्रामक रोग हो । यसलाई पहिले मंकीपक्स भनिन्थ्यो । अफ्रिकी देश कङ्गोमा यो रोगबाट प्रारम्भिक चरणमा ४५० भन्दा बढीले ज्यान गुमाइसकेका थिए । रासस
