संघीय शिक्षा ऐनको विरोध गर्दै आज संस्थागत विद्यालय प्याब्सन सूर्योदय नगर कार्य समितिले विरोध र्याली निकालेको छ। सरकारले नीजि विद्यालयहरु बन्द गराउने गरि शिक्षा ऐन ल्याउन लागेको भन्दै विरोध जनाइएको छ ।
इलामको सूर्योदय नगरपालिकाको फिक्कलमा निकालिएको सो शान्तिपूर्ण विरोध कार्यक्रममा नीजि विद्यालयका पहेला गाडीहरु लामबद्द गुडाइएका थिए।
गुम्बापथबाट शुरु भएको र्याली शान्तिचोक हुदै फिक्कल चोकमा आएर कोणसभामा परिणत हुदै सम्पन्न भएको थियो । कोणसभालाई सम्बोधन गर्दै प्याब्सन केन्द्रीय प्राज्ञिक सल्लाहकार समिति सदस्य युवराज वाशिष्ठले ऐनमा व्यवस्था भएका केही बुँदामा असहमति रहेको जनाउँदै सो प्रति विरोध जनाएको बताएका छन्।
देशव्यापी रुपमा आयोजना गरिएको विरोध कार्यक्रम अन्तर्गत आज इलामको इलाम नगरपालिका र सूर्योदय नगरपालिकामा कार्यक्रम भएको र भोलिदेखि थप कार्यक्रमहरु अघि बढ्ने प्याब्सन सूर्योदय नगर कार्यसमितिका अध्यक्ष लाकेल लामाले जानकारी दिए।
