काठमाडौं । पछिल्ला दिनमा ‘जेनजी’ पुस्ताले थालेको आन्दोलन देशभर फैलिँदै जाँदा स्वास्थ्य संस्थाहरूमा बिरामीको चाप असामान्य रूपमा बढेको छ ।
विशेषगरी राजधानी केन्द्रित प्रदर्शनमा घाइते भएकाहरूलाई तत्काल उपचार दिन अस्पतालहरूलाई ठूलो दबाब परेको देखिन्छ ।
मीनभवनस्थित सिभिल अस्पतालमा आकस्मिक बाहेकका नियमित सेवा रोकिएको छ । अस्पतालका निर्देशक डा. मोहनचन्द्र रेग्मीका अनुसार स्रोतसाधन र जनशक्ति दुवै अभाव भएका कारण चिकित्सक तथा नर्सहरू लगातार ड्युटीमा खटिन बाध्य भएका छन् । हालसम्म ४६ जना घाइते त्यहाँ उपचाररत छन् ।
त्रिवि शिक्षण अस्पतालमा पनि घाइतेहरूको उपचारलाई नै प्राथमिकता दिइएको छ । अस्पतालका निर्देशक डा. सुवास आचार्यले ओपीडी भने चलिरहेको तर यातायात अवरुद्ध भएकाले सर्वसाधारण बिरामी आइपुग्न नसकेको बताए । अहिले अस्पतालमा ५३ जना घाइते उपचाररत छन् भने मुख्य शल्यक्रिया सेवा अस्थायी रूपमा रोकिएको छ ।
राष्ट्रिय ट्रमा सेन्टरमा हाल ४० जना घाइतेको उपचार भइरहेको छ ।
चार जना शल्यक्रियापछि आईसीयूमा राखिएका छन् । अस्पतालका निर्देशक डा. बद्री रिजालका अनुसार स्रोतसाधन अपुरो भए पनि आकस्मिक सेवा निरन्तर छ ।
त्यस्तै, परोपकार प्रसूति तथा स्त्रीरोग अस्पतालले पनि २४ घण्टा सेवा निरन्तर जारी राखेको जनाएको छ ।
अस्पतालका निर्देशक डा. श्रीप्रसाद अधिकारीका अनुसार ओपीडी र आकस्मिक दुवै सेवा सञ्चालनमा छन् भने शुल्कसहित दिइने सेवाहरू भने रोकिएका छन
