जेनजी आन्दोलनमा हालसम्म ३० जनाको मृत्यु, एक हजारभन्दा बढी घाइते
काठमाडौँ – देशभर भइरहेको जेनजी आन्दोलनका क्रममा हालसम्म ३० जनाको मृत्यु भएको स्वास्थ्य तथा जनसङ्ख्या मन्त्रालयले जनाएको छ। साथै, एक हजारभन्दा बढी नागरिक घाइते भएका छन् र विभिन्न अस्पतालमा उपचार भइरहेको छ।
मन्त्रालयका सचिव डा. विकास देवकोटाले बताए अनुसार, देशभरिका २९ वटा अस्पतालमा अहिलेसम्म ३० जनाको मृत्यु र १,०६१ जनाको उपचार भइसकेको छ। मन्त्रालयले अस्पतालहरूबाट प्राप्त विवरणलाई आधार बनाएर यो जानकारी सार्वजनिक गरेको हो।
घाइतेहरूको विवरण अनुसार, निजामती कर्मचारी अस्पतालमा ६, राष्ट्रिय ट्रमा सेन्टरमा ८, एभरेष्ट अस्पतालमा ३, काठमाडौँ मेडिकल कलेज सिनामङ्गलमा २, त्रिभुवन विश्वविद्यालय शिक्षण अस्पतालमा १, फ्रन्टलाइन अस्पतालमा ३, बीपी कोइराला स्वास्थ्य विज्ञान प्रतिष्ठान धरानमा २ र भेरी अस्पतालमा ५ जनाको मृत्यु भएको थियो।
यसैबीच, अहिलेसम्म २७४ जनाको भर्ना भई उपचार भइरहेको छ। त्यस्तै, ५६ जनालाई एक अस्पतालबाट अर्को अस्पतालमा स्थानान्तरण गरिएको छ भने ७१९ जना उपचारपछि घर फर्किसकेका छन्।
डा. देवकोटाका अनुसार, अहिलेसम्म निजामती कर्मचारी अस्पतालमा ४८, ट्रमा सेन्टरमा ५८, वीर अस्पतालमा २०, त्रिवि शिक्षण अस्पतालमा २५, काठमाडौँ मेडिकल कलेजमा २४ र वीरेन्द्र सैनिक अस्पतालमा २६ जनाको उपचार भइरहेको छ।
सबैभन्दा बढी उपचार निजामती कर्मचारी अस्पतालमा ४३६ जना, ट्रमा सेन्टरमा १६१ जना र एभरेष्ट अस्पतालमा १०९ जनामा गरिएको छ ।
