काठमाडौँ उपत्यकामा नेपाली सेनाले जारी गरेको निषेधाज्ञा र कर्फ्युका बावजुद केही अत्यावश्यक सेवाहरूलाई सहज रूपमा सञ्चालन गर्न अनुमति दिएको छ। सेनाको जनसम्पर्क तथा सूचना निर्देशनालयले बुधबार साँझको सुरक्षा विश्लेषणपछि सूचना जारी गरेको हो।
सेनाले भदौ २६ गते बिहान १० बजेदेखि बेलुका ५ बजेसम्म निषेधाज्ञा र सोही दिन राति ७ बजेदेखि भदौ २७ गते बिहान ६ बजेसम्म कर्फ्यु लाग्ने जनाएको छ।
विज्ञप्तिमा उल्लेख छ कि यस अवधिमा निम्न प्रकारका सवारी साधन सञ्चालन गर्न पाइनेछ:
स्वास्थ्य सम्बन्धी सवारी: एम्बुलेन्स, शव वाहन, दमकल, स्वास्थ्यकर्मीका सवारी
सुरक्षाकर्मी र सञ्चारकर्मीका सवारी
आवश्यक वस्तु ढुवानी: खाद्यान्न, दूध, तरकारी, पानी, इन्धन, औषधि
त्यस्तै, सरकारी कार्यालय, बैंक, वित्तीय संस्था र सार्वजनिक निकायका कर्मचारीहरूले परिचयपत्र देखाएर कार्यालयसम्म आवतजावत गर्न सक्नेछन्। आन्तरिक तथा अन्तर्राष्ट्रिय उडानका यात्रुहरू पनि टिकट देखाएर विमानस्थलसम्म जान पाउनेछन्। सेनाले आवश्यक परेमा नजिकैको सुरक्षा कार्यालयसँग समन्वय गर्न पनि आग्रह गरेको छ।
काठमाडौँ बाहिरको क्षेत्रमा भने, सम्बन्धित जिल्लाको सुरक्षा अवस्था अनुसार जिल्ला सुरक्षा समितिले निर्णय गरी व्यवस्था गर्ने सेनाले जनाएको छ।
