काठमाडौँ। केही दिनयता अस्तव्यस्त बनेको राजधानी उपत्यकाको अवस्था क्रमशः सामान्य बन्दै गएको छ। सुरक्षा संयन्त्र सक्रिय बनेपछि राजधानी मात्र नभई देशका अन्य भागमा पनि दैनन्दिन गतिविधि सहज बन्दै गएको देखिन्छ।
नेपाली सेनाले अन्य सुरक्षासंस्थासँग समन्वय गर्दै जिम्मेवारी लिएको कारण सुरक्षा परिस्थिति नियन्त्रणमा आएको अधिकारीहरू बताउँछन्।
उता, आन्दोलनरत जेन–जेड पुस्ताका प्रतिनिधिहरू छलफलका लागि वार्ताको तयारीमा रहेको जनाइएको छ। उनीहरूले वार्ताका लागि प्रतिनिधि चयन प्रक्रिया अघि बढाइरहेका छन्।
यससँगै विभिन्न सामाजिक सङ्घ–सङ्गठनहरूले समेत समस्याको दीर्घ समाधानका लागि संवादमार्फत अघि बढ्न आग्रह गरिरहेका छन्। विशेषज्ञहरूको भनाइमा, सहमतिको बाटो रोजेमा आन्दोलनपश्चात् उत्पन्न तनाव चाँडै अन्त्य भई जनजीवन स्थायीतर्फ जाने सम्भावना छ।
