काठमाडौं । नवनियुक्त अर्थमन्त्री डा. रामेश्वर खनालले आगामी दिनमा बजेटलाई बढी प्रभावकारी बनाउन टुक्रे योजनाहरू कटौती गर्ने तयारी गरेको बताएका छन्। सोमबार मन्त्रालयमा पत्रकारहरूसँग कुरा गर्दै उनले स्रोत व्यवस्थापनलाई सबल बनाउने लक्ष्यसहित केही ठोस कदम चालिने बताएका हुन्।
खनालका अनुसार बजेटमा समावेश गरिएका साना तथा प्रभावहीन कार्यक्रमलाई हटाउन कार्यदल गठन गर्ने प्रक्रिया अघि बढाइएको छ। उनले मुलुकको सीमित स्रोतलाई दीर्घकालीन र प्राथमिकतापूर्ण योजनामा केन्द्रित गर्नुपर्ने आवश्यकता रहेको उल्लेख गरे।
अर्थमन्त्रीले सार्वजनिक सम्पत्तिको संरक्षण र नियमित मर्मतसम्भारमा जोड दिने प्रतिवद्धता पनि व्यक्त गरे। उनका अनुसार उपेक्षा र बेवास्ताका कारण बिग्रँदै गएका सरकारी संरचना र सम्पत्तिलाई संरक्षण गरेर मात्र दीर्घकालीन लाभ लिन सकिने छ।
खनालले निजी क्षेत्रलाई समेत विश्वासमा लिएर राजस्व वृद्धिका लागि प्रयास गरिने स्पष्ट पारे। उनका भनाइमा अर्थतन्त्र सबल बनाउन व्यवसायी समुदायलाई सहकार्यमा ल्याउन आवश्यक छ, जसका लागि सरकार नीति र कानुनी स्पष्टता दिन तयार छ।
त्यसैगरी उनले अघिल्ला वर्षमा आएको विभिन्न अध्ययन प्रतिवेदन तथा सुधारका सुझावलाई व्यवहारिक रुपमा कार्यान्वयन गर्ने घोषणा गरे। “मुलुकलाई स्थायित्व र समृद्धि तर्फ अघि बढाउन सुधार आवश्यक छ,” मन्त्री खनालले भने, “निजी क्षेत्रको सहकार्य, जिम्मेवार सरकार र सचेत नागरिकताले मात्र आर्थिक रुपान्तरण सम्भव छ।”
