काठमाडौँ, भदौ ३०। त्रिभुवन विश्वविद्यालय शिक्षण अस्पताल, महराजगञ्जको फरेन्सिक विभागमा हाल जेनजी आन्दोलनका क्रममा ज्यान गुमाएका व्यक्तिहरूको शव परीक्षण तीव्र रूपमा भइरहेको छ। अस्पताल स्रोतका अनुसार, अहिलेसम्म ४६ शव परीक्षणका लागि ल्याइसकिएको छ।
फरेन्सिक विभागका प्रमुख डा. गोपाल चौधरीले जानकारी दिए अनुसार, २८ जनाको पोस्टमार्टम कार्य सकिएको छ। उनी भन्छन्, “२३ शव आफन्तले लिएर गइसकेका छन् भने सात शव यस्तो अवस्थामा छन्, जसलाई चिन्न समस्या भइरहेको छ। यी शवको पहिचानका लागि डिएनए परीक्षण आवश्यक पर्नेछ।”
डा. चौधरीले थपे, “शवहरूमा गोलीको चोट, जलेका निशान र रगतसँग सम्बन्धित चोटहरू भेटिएका छन्। पोस्टमार्टम कार्य जारी छ र प्रत्येक शवको परीक्षण सावधानीपूर्वक गरिँदैछ। पहिचान गर्न नसकिने अवस्थामा दाँतको परीक्षण र फिङ्गरप्रिन्ट प्रयोग गरिन्छ।”
