काठमाडौं – राजधानीको महाराजगञ्ज क्षेत्रमा जेनजी आन्दोलनको बीचमा भेटिएको करिब १५ केजी चाँदीको सिक्का स्थानीयहरूले प्रहरीको जिम्मा लगाएका छन्।
काठमाडौँ महानगरपालिका–३, महाराजगञ्ज निवासी विकास गुरुङ सहित तीन जनाले सो चाँदी सशस्त्र प्रहरी बललाई बुझाएका हुन्। स्थानीयको सक्रियतापछि उक्त चाँदीलाई सशस्त्र प्रहरीले तत्काल जिल्ला प्रहरी परिसर, काठमाडौँमा पठाएको जनाइएको छ।
जिल्ला प्रहरी परिसर, काठमाडौँका प्रमुख एसपी अपिल बोहराका अनुसार, प्रारम्भिक जाँचपछि थप अनुसन्धान सुरु गरिएको छ। बोहराले भने, “चाँदी कहाँबाट आएको हो र यसको पछाडि अरू केही घटना जोडिएको छ कि भन्नेबारे हामी अनुसन्धान गरिरहेका छौँ।”
हाल प्रहरीले सिक्काको वास्तविकता र यसको स्रोत पत्ता लगाउने कामलाई प्राथमिकता दिएको छ। यसबारे थप विवरण पछि सार्वजनिक गर्ने बताइएको छ।
