इलाम । इलामकी चेली भावना खपाङ्गी मगर प्रतिष्ठित रियालिटी शो एक्टिङ स्टार को फाइनल चरणमा प्रवेश गरेकी छन् । अभिनय प्रतिभाको खोजीमा केन्द्रित यो रियालिटी शो अहिले अन्तिम चरणमा पुगेको छ भने फाइनलमा पाँच जना प्रतिस्पर्धी भित्रिएका छन् ।
भावनाले शोमा आफ्नो अभिनयकला मार्फत निर्णायकदेखि दर्शकसम्मको ध्यान खिच्न सफल भएकी छन् । इलामकै माटोमा जन्मेर हुर्किएकी उनले सानैदेखि अभिनयमा रुचि राख्दै आएकी थिइन् । “यो फाइनलसम्म आइपुग्नु मेरो लागि ठूलो उपलब्धि हो । अब तपाईंहरू सबैको साथ र भोट पाए भने विजयी बन्ने विश्वास छ,” उनले सामाजिक सञ्जालमार्फत बताएकी छन् ।
फाइनल प्रतिस्पर्धामा रहेका पाँच प्रतिभामध्ये विजेता चयन भोटिङमार्फत हुनेछ । दर्शक र शुभेच्छुकहरूले OSR Connect वा Cinemaghar एप प्रयोग गरी मनपर्ने प्रतिस्पर्धीलाई भोट दिन सक्ने व्यवस्था गरिएको छ ।
इलामका स्थानीय युवती भावना खपाङ्गी मगरको यो उपलब्धि इलामबासी मात्र नभई सम्पूर्ण देशकै गौरवको विषय बनेको छ ।
