इलाम । दशैं–तिहार नजिकिँदै गर्दा सूर्योदय नगरपालिकाले उपभोक्ताको स्वास्थ्य र सुरक्षालाई ध्यानमा राख्दै फिक्कल बजारमा कडाइका साथ अनुगमन गरेको छ।
नगरपालिकाले विशेषगरी खाद्य सामग्री, किराना तथा उपभोग्य वस्तुमा म्याद गुज्रिएका सामान, गुणस्तरीय परीक्षण नभएका उत्पादन र अवैध रुपमा भित्र्याइएका सामग्री बिक्री भइरहेको सूचनाका आधारमा छड्के निरीक्षण गरेको हो।
अनुगमनका क्रममा म्याद नाघेका विभिन्न खाद्य सामग्री, अनुमति बिना बिक्रीवितरण भइरहेको गुटखाजन्य पदार्थ जफत गरिएको छ। यसअघि पनि इलाम नगरपालिकाले अवैध मदिरा कारोबार गर्ने समूहविरुद्ध कारबाही गर्दै ठूलो परिमाणमा मदिरा नियन्त्रणमा लिएको थियो।
चाडपर्वका बेला मात्र नभई अन्य समयमा समेत यस्ता गतिविधि बढ्ने गरेको उपभोक्ताको गुनासो छ। तर, पछिल्लो समय स्थानीय तहले अनुगमनलाई प्राथमिकतामा राखेको भन्दै सर्वसाधारणले प्रशंसा गरेका छन्।
अनुगमनको क्रममा उपस्थित ग्राहकहरूले यस किसिमको निरीक्षणलाई निरन्तरता दिन सुझाव दिएका छन्। उनीहरूले बजार व्यवस्थापन पारदर्शी बनाउनका लागि त्रैमासिक वा चौमासिक रुपमा अनुगमन गर्नुपर्ने, नगर वडामा दर्ता बिना चलाइएका पसल तथा कारोबारलाई कानुनी दायरामा ल्याउनुपर्नेमा जोड दिएका छन्।
सूर्योदय नगरपालिकाका प्रतिनिधिहरूले भने, “चाडबाडमा नागरिकलाई नोक्सान पुर्याउने गतिविधि रोक्न हामी गम्भीर छौं। उपभोक्ताको स्वास्थ्य नै हाम्रो पहिलो प्राथमिकता हो।”
यसरी स्थानीय सरकारको सक्रियतापछि बजारमा व्यापारीहरू सचेत हुने र उपभोक्ता अधिकार थप सुरक्षित हुने विश्वास गरिएको छ।
