विपद्को बीचमा समयमै उद्धार, आमा र शिशु दुवैको अवस्था सुरक्षित
इलाम ।
अविरल वर्षा र प्राकृतिक विपदका बीच इलाम नगरपालिका–११ सोयाक निन्दाखुबाट एक गर्भवती महिलाको सफल उद्धार गरिएको छ । स्थानीय स्तरमा समन्वय र सहकार्यका कारण २७ वर्षीया अस्मिता राईको ज्यान सुरक्षित गर्न सम्भव भएको हो ।
शुक्रबार राति स्वास्थ्य समस्या गम्भीर बन्दै गएपछि स्थानीयबासीले सम्बन्धित निकायलाई खबर गरेका थिए । कठिन भू–भाग र निरन्तर वर्षाका कारण आवागमन अवरुद्ध रहे पनि तत्काल उद्धार टोली परिचालन गरिएको थियो ।
उद्धार कार्यमा स्वास्थ्य कार्यालय इलामका प्रमुख अदित्य शाक्य, सामुदायिक स्वास्थ्य केन्द्र निन्दाखुका प्रमुख विष्णु बहादुर राई, स्वास्थ्यकर्मी अनिता सुब्बा, र जिल्ला प्रशासन कार्यालय इलामको समन्वयमा सफलतापूर्वक उद्धार सम्पन्न भएको हो ।
समयमै उद्धार कार्य सम्पन्न भएपछि अस्मिता राईलाई सुरक्षित स्थानमा पुर्याइएको र उपचारपछि आमा र बच्चा दुवैको स्वास्थ्य अवस्था सामान्य रहेको स्वास्थ्यकर्मीहरूले जनाएका छन् ।
स्थानीय जनप्रतिनिधिहरू र उद्धार टोलीका सदस्यहरूले विपदका समयमा तत्काल उद्धार सम्भव हुन सक्ने उदाहरण प्रस्तुत गरेको भन्दै गर्भवती महिलाको जीवन रक्षा भएकोमा खुशी व्यक्त गरेका छन् ।
यस उद्धारमा समन्वय, सहयोग र सक्रिय भूमिका निभाउने सबैप्रति स्थानीयले आभार व्यक्त गरेका छन् ।
यस घटनाले विपदका समयमा सहकार्य र शीघ्र प्रतिक्रिया कत्तिको महत्वपूर्ण हुन्छ भन्ने देखाएको छ ।
