इलाम । बुद्धिचाल (चेस) प्रेमीहरूका लागि खुसीको खबर — इलामको फाकफोकथुम गाउँपालिकामा पहिलोपटक राष्ट्रिय स्तरको रेटिङ्ग चेस प्रतियोगिता हुने भएको छ।
आगामी कात्तिक ९ देखि ११ गतेसम्म गाउँपालिकाको सभाहलमा हुने यो प्रतियोगिता फाकफोकथुम चेस एशोसिएसनको आयोजनामा र फिडे इभेन्ट कोड ४४४३३१ अन्तर्गत सञ्चालन हुनेछ।
खुला सहभागिता, फिडे रेटिङमा सूचीकृत
नेपालभरका सबै चेस खेलाडीहरूका लागि यो प्रतियोगिता खुला रहनेछ। सहभागी खेलाडीहरूको खेल परिणाम अन्तर्राष्ट्रिय चेस महासंघ (FIDE) को अधिकृत रेटिङ्ग प्रणालीमा सूचीकृत हुनेछ।
प्रतियोगितामा ९ राउन्डका खेल हुनेछन्। पहिलो राउन्डको पेयरिङ बाको एक्सेलेरेशन प्रणालीबाट तय गरिनेछ। प्रत्येक खेलका लागि ६० मिनेट समय र प्रत्येक चालपछि ३० सेकेन्ड इन्क्रिमेन्ट दिइने नियम लागू हुनेछ।
खेल सुरु भएको ३० मिनेटभित्र उपस्थित नभए खेलाडीको खेल स्वतः रद्द हुनेछ।
दर्ता र पुरस्कार
आयोजक समितिका अनुसार दर्ता शुल्क स्थानीय र १६ वर्षमुनिका खेलाडीका लागि १,००० रुपैयाँ तथा अन्य सहभागीका लागि १,५०० रुपैयाँ तोकिएको छ।
दर्ता कात्तिक ८ गते साँझ ६ बजेसम्म पूरा गर्नुपर्नेछ।
प्रतियोगितामा उत्कृष्ट प्रदर्शन गर्ने खेलाडीहरूलाई जम्मा २ लाख ५ हजार ५ सय रुपैयाँ बराबरको नगद पुरस्कार वितरण गरिनेछ।
पुरस्कार विवरण यसप्रकार छन्:
🥇 पहिलो स्थान : रु. ३५,०००
🥈 दोस्रो स्थान : रु. २०,०००
🥉 तेस्रो स्थान : रु. १५,०००
चौथो स्थान : रु. १०,०००
पाँचौं स्थान : रु. ७,०००
त्यसैगरी विभिन्न श्रेणीगत पुरस्कारहरू पनि राखिएका छन् — अनरेटेड, एलो १६०० मुनि, एलो १८०० मुनि, भेटरन (S55), अण्डर–१६, महिला, अपाङ्ग, जनप्रतिनिधि, साथै हिल्स, इलाम र फाकफोकथुमका उत्कृष्ट खेलाडीहरूलाई पनि सम्मान गरिनेछ।
स्थानीयस्तरमा उत्साह
फाकफोकथुम गाउँपालिकाले यस प्रतियोगितालाई खेल र पर्यटन प्रवर्द्धनसँग जोडेर हेरेको छ। स्थानीय युवा तथा विद्यालयस्तरका खेलाडीहरूमा चेसप्रतिको आकर्षण बढोत्तरी हुने अपेक्षा गरिएको छ।
गाउँपालिका अध्यक्षले पनि यस कार्यक्रमले फाकफोकथुमलाई “चेस हब” को रूपमा चिनाउने विश्वास व्यक्त गरेका छन्।
