काठमाडौँ । जेनजी आन्दोलनका क्रममा भदौ २४ गते विभिन्न स्थानमा भएको आगजनीबाट क्षति पुगेका प्रहरी कार्यालयहरू बिस्तारै पुनः सञ्चालनमा आएका छन्। नेपाल प्रहरीका महानिरीक्षक चन्द्रकुवेर खापुङका अनुसार, आगजनीमा परेका ४६५ प्रहरी कार्यालयमध्ये ४०१ वटा कार्यालय पुनर्स्थापना भई सञ्चालनमा आइसकेका छन्।
७०औं प्रहरी दिवसको अवसरमा आयोजना गरिएको अमर प्रहरीप्रति श्रद्धाञ्जली कार्यक्रममा बोल्दै महानिरीक्षक खापुङले समुदायको सहयोग र सक्रिय सहभागिताका कारण धेरै कार्यालयहरू पुनः सञ्चालनमा ल्याउन सम्भव भएको बताए।
उनले भने, “समुदाय स्तरबाट स्वस्फूर्त रूपमा ती कार्यालयहरू पुनः सञ्चालनमा आएका हुन्। हामी नेपाली जनताको सहयोगी भावना र विश्वासका लागि आभारी छौं।”
नेपाल प्रहरीले अहिले देशभर ७९ हजार ५४१ जनशक्तिसहित सेवा सञ्चालन गरिरहेको छ। प्रहरी महानिरीक्षक खापुङका अनुसार, देशभरबाट ९३९ स्थानमा नयाँ प्रहरी इकाइ स्थापना गर्न माग आएको छ। उनले थपे, “नेपाल प्रहरीलाई अझ प्रभावकारी बनाउन करिब २५ हजार थप जनशक्तिको आवश्यकता रहेको छ।”
उनले प्रहरी संगठनमाथि उठ्ने आलोचना र प्रश्नहरूलाई पनि गम्भीरतापूर्वक लिनुपर्ने बताए।
उनका शब्दमा, “हामीले जनताको विश्वास जित्न आफैँलाई शुद्ध र पारदर्शी बनाउनु अत्यावश्यक छ। प्रहरीको आचरण नै हाम्रो पहिचान हो, त्यसमा सुधार ल्याउन हामी प्रतिबद्ध छौं।”
नेपाल प्रहरीले हाल समुदायसँग सहकार्यमा आधारित सुरक्षा व्यवस्था सुदृढ बनाउने अभियान चलाइरहेको छ। आगजनीपछि पुनःस्थापित प्रहरी कार्यालयहरूले स्थानीय सुरक्षामा सहयोग पुर्याइरहेका छन्।
