अभिनय क्षेत्रमा चर्चित र लोकप्रिय टेलिभिजन शो “एक्टिङ स्टार” को सिजन–वानमा देशभरका प्रतिस्पर्धीलाई पछि पार्दै, इलामकी प्रतिभाशाली छोरी भावना खपाङ्गी मगर ले फर्स्ट रनर अप को उपाधि सहित रू १० लाख नगद जित्न सफल भएकी छिन्। आज उनले इलाममै पत्रकार सम्मेलन आयोजना गरी आफ्नो सफलतामा योगदान पुर्याउने सबै मतदाताहरू र समर्थकहरूलाई हार्दिक धन्यवाद दिइन्।
देउमाई नगरपालिका, इलामकी भावना खपाङ्गी मगर बाल्यकालदेखि नै अभिनय र मञ्चकलाप्रतिको गहिरो रुचि राख्थिन्। उनले आफ्नो अभिनय यात्रा चेतना नाट्य समूह, इलाम मार्फत सुरु गरिन्। उनले अभिनय गरेको नाटक “घरजम” ले हरिप्रसाद कल्याणी रिमाल राष्ट्रिय नाटक प्रतियोगिता २०८१ मा देशभरका ३१ नाटकलाई पछि पार्दै प्रथम स्थान हासिल गर्यो। सोही नाटकबाट उनलाई उत्कृष्ट अभिनेत्री को उपाधि पनि प्रदान गरियो।
भावनाले चलचित्र “ऊनको स्वेटर” बाट फिल्म डेब्यु गरिन्, जुन हालैका वर्षहरूमा ब्लकबस्टर चलचित्रको रूपमा प्रशंसा पाएको थियो। एक्टिङ स्टार सिजन–वान को ग्राण्ड फिनालेमा प्रवेश गर्नु अघि नै उनले २–३ वटा नयाँ चलचित्रमा साइन गरिसकेकी थिइन्। उनले म्यूजिक भिडियोमा समेत अभिनय गर्दै आफ्नो प्रतिभा प्रदर्शन गरिरहेकी छिन्।
भावना खपाङ्गी मगरलाई हार्दिक बधाई र उज्ज्वल भविष्यको शुभकामना!
