इलाम – माङसेबुङ गाउँपालिका–३ चिबुवामा जारी प्रथम संस्करणको चिबुवा कप फुटबल प्रतियोगितामा पीएफसी महमाई र आयोजक टोली ‘ए’ विजयी भएका छन्।
शुक्रबार सम्पन्न पहिलो खेलमा पीएफसी महमाईले बोझोला एफसीलाई ४–१ को गोल अन्तरले पराजित गरेको हो। पीएफसीको जितमा उदिप लिम्बूले दुई गोल गर्नुका साथै सुमन लिम्बू र जिसन लिम्बूले एक–एक गोल थपेका थिए। दोस्रो खेलमा आयोजक ‘ए’ टोलीले सिङफेरे एफसीलाई ४–० गोल अन्तरमा पराजित गर्दै प्रतियोगिताको अर्को चरणमा प्रवेश गरेको छ।
प्रतियोगिता अघि बिहीबारको खेलमा आयोजक चिबुवा युथ क्लब ‘बी’ लाई पराजित गर्दै दशमी एफसी विजयी भएको थियो। त्यस्तै, युथ अफ माङसेबुङलाई पराजित गर्दै बतासे एफसी, र योङहाङ एफसीलाई पराजित गर्दै कालापानी एफसी विजयी भएका थिए।
प्रतियोगिताको अन्तर्गत शनिवार पहिलो खेलमा बतासे एफसी र पीएफसी महमाईबीच प्रतिस्पर्धा हुनेछ भने दोस्रो खेलमा कालापानी एफसी र दशमी एफसीबीच प्रतिस्पर्धा हुने कार्यक्रम तय गरिएको छ।
प्रतियोगिताको विजेताले नगद ४० हजार रुपैयाँ, ट्रफि, मेडल र प्रमाणपत्र प्राप्त गर्नेछन् भने उपविजेताले २५ हजार रुपैयाँसहित ट्रफि र प्रमाणपत्र पाउने व्यवस्था छ।
स्थानीय जनकल्याण आधारभूत विद्यालयको खेलमैदानमा जारी प्रतियोगिताको फाइनल कात्तिक १० गते बिहान १० बजे हुने जानकारी आयोजकले दिएको छ।
यस प्रतियोगितामा इलाम र पाँचथरका २४ टोली सहभागी भएका छन्, जसले क्षेत्रीय फुटबलमा प्रतिस्पर्धा र खेल कौशलको उत्कृष्ट प्रदर्शन गरेका छन्।
