बुटवल । लुम्बिनी प्रदेश सरकारले चालु आर्थिक वर्षको पहिलो त्रैमासिक अवधिमा जम्मा ९.३५ प्रतिशत मात्र बजेट खर्च गरेको पाइएको छ।
प्रदेशका विभिन्न मन्त्रालयहरूले खर्चमा सुस्त गति देखाएका छन्। तीमध्ये स्वास्थ्य मन्त्रालयले सबैभन्दा बढी अर्थात् करिब ६० करोड रुपैयाँभन्दा माथि खर्च गरेको छ भने युवा तथा खेलकुद मन्त्रालयले भने पुँजीगत शीर्षकअन्तर्गत कुनै खर्च गर्न सकेको छैन।
आर्थिक विश्लेषकहरूका अनुसार, प्रत्येक वर्षको सुरुवातमा खर्च ढिलो र अन्तिम त्रैमासमा हतारमा बजेट सकाउने प्रवृत्ति कायम रहँदै आएको छ। उनीहरूले यस्तो प्रणालीले कामको गुणस्तर र दीर्घकालीन योजना कार्यान्वयनमा असर पार्ने भन्दै सुधारको आवश्यकता औंल्याएका छन्।
विशेषज्ञहरूले बजेट कार्यान्वयनलाई नियमित र सन्तुलित ढंगले अघि बढाउन योजना निर्माण, टेण्डर प्रक्रिया र खर्च स्वीकृति प्रणालीलाई छरितो बनाउने सुझाव दिएका छन्।
