इलाम । कोशी प्रदेश प्रहरी कार्यालय विराटनगरले इलाका प्रहरी कार्यालय नयाँबजार, इलामका प्रहरी सहायक निरीक्षक रमेश कुमार चौधरीलाई असोज महिनाको “सर्वोत्कृष्ट प्रहरी” (Best Police of the Month) घोषित गरेको छ।
गत असोज १९ गते माइजोगमाई गाउँपालिकामा अविरल वर्षाका कारण आएको बाढी–पहिरोका बेला उनले उच्च मनोबलका साथ उद्धार कार्यमा सक्रिय भूमिका निभाएका थिए। चौधरीले घटनास्थलमा खटिँदै ८ जनाको शव उत्खनन, दुई सुत्केरी महिला र एक सिकिस्त बिरामीको हवाई उद्धार तथा क्षतिग्रस्त प्रहरी कार्यालयका लागि आवश्यक सहयोग जुटाउने कार्य गरेका थिए।
उनको जिम्मेवारीप्रतिको निष्ठा, जोखिममा समेत देखाएको साहस र उत्कृष्ट कार्य सम्पादनको कदर गर्दै कोशी प्रदेश प्रहरीले उनलाई असोज महिनाको “सर्वोत्कृष्ट प्रहरी” उपाधिबाट सम्मानित गरेको हो।
