काठमाडौं। शिक्षा, विज्ञान तथा प्रविधि मन्त्री महावीर पुनले सिंहदरबारस्थित मन्त्रालयबाट नियमित कामकाज सुरु गरेका छन्।
जेनजी आन्दोलनका क्रममा सिंहदरबारस्थित शिक्षा, विज्ञान तथा प्रविधि मन्त्रालयमा क्षति पुगेपछि मन्त्रालयको कामकाज लैनचौरस्थित केशर महलबाट सञ्चालन भइरहेको थियो।
तर, सिंहदरबारस्थित कार्यालय अब कामकाजका लागि पूर्ण रूपमा तयार भएसँगै मन्त्री पुनले आइतबारदेखि सिंहदरबारबाटै काम सुरु गरेका हुन्।
मन्त्री पुन गत असोज ६ गते शिक्षामन्त्री पदमा नियुक्त भएका थिए र त्यसपछि असोज ७ गतेदेखि केशर महलमा कामकाज गर्दै आएका थिए।
यस कदमले मन्त्रालयका दैनिक प्रशासनिक कामहरू सञ्चालनमा सहजता र पारदर्शिता ल्याउने अपेक्षा गरिएको छ।
