इटहरी, सुनसरी । जिल्ला प्रहरी कार्यालय सुनसरीका डिएसपी योगराज खतिवडालाई काज सरुवा गरिएको छ। उनी कोशी प्रदेश प्रहरी कार्यालय, विराटनगरमा सरुवा भएका हुन्।
खतिवडाको स्थानमा डिएसपी चन्द्र खड्का सुनसरी आइपुग्ने भएका छन्। खतिवडाले झण्डै सात महिना मात्र सुनसरीमा सेवा अवधि पूरा गरेका थिए। उनको आकस्मिक सरुवाले प्रहरी संगठनभित्र चर्चा पाएको छ।
प्रहरी स्रोतका अनुसार, एसपी केशव थेबे र डिएसपी खतिवडाबीच कार्यशैलीमा केही असमझदारी रहेको बताइन्छ। केही मातहत इन्चार्जहरूले पनि डिएसपी खतिवडाको व्यवहारबारे गुनासो गरेको स्रोतले जनाएको छ।
एक प्रहरी अधिकृतका अनुसार, “एसपी थेबे र डिएसपी खतिवडाबीच तालमेल राम्रो थिएन। यसअघि पनि खतिवडाको अघिल्ला एसपीसँग कार्यगत मतभेद देखा परेको थियो।”
खतिवडामाथि सहकर्मीमाथि कडा व्यवहार र अपशब्द प्रयोग गरेको आरोप समेत लागेको बताइन्छ।
यस विषयमा कोशी प्रदेश प्रहरी कार्यालय, विराटनगरका प्रवक्ता एसएसपी दीपक पोखरेलले भने, “डिएसपी खतिवडाको सरुवा नियमित प्रशासनिक प्रक्रिया अन्तर्गत गरिएको हो,” भनेर संक्षिप्त प्रतिक्रिया दिए।
स्रोतका अनुसार, सुनसरीका एसपी थेबे बिदामा रहेका बेला डिएसपी सरुवा गरिएको हो। हाल विराटनगरमा कार्यरत डिएसपी चन्द्र खड्का छिट्टै सुनसरीमा कार्यभार सम्हाल्ने तयारीमा छन्। एसपी थेबे बिदाबाट फर्किएपछि औपचारिक जिम्मेवारी हस्तान्तरण हुने जनाइएको छ।
