अखिल नेपाल फुटबल संघ (एन्फा) ले नेपाली फुटबलको संरचना तथा प्रतियोगितालाई व्यवस्थित गर्न राष्ट्रिय लिग र सहिद स्मारक ‘ए’ डिभिजन लिगबारे औपचारिक छलफल प्रक्रिया सुरु गरेको छ।
एन्फाले सुरु गरेको छलफलमा ‘ए’ डिभिजन लिगका क्लब, प्रतिनिधि तथा खेलाडीहरू सक्रिय रूपमा सहभागी भएका छन्। आगामी सिजनको तयारी, प्रतियोगिताको ढाँचा, समय तालिका तथा व्यवस्थापन–सम्बन्धी विषयमा व्यापक परामर्श जारी रहेको एन्फाले जनाएको छ।
यसअघि क्लब र खेलाडीहरूले ‘ए’ डिभिजन लिग नियमित रूपमा आयोजना गर्नुपर्ने मागसहित आन्दोलनमा उत्रिएका थिए। फुटबल खेलाडीहरूले प्रशिक्षण, करिअर निरन्तरता र प्रतिस्पर्धात्मक वातावरण सिर्जनाका लागि लिग अनिवार्य रहेको भन्दै दबाबमूलक कार्यक्रम सञ्चालन गर्दै आएका थिए।
नेपाली फुटबल पछिल्लो समय अव्यवस्था, समयमै लिग नहुनु, संरचनागत समस्या र प्रशासनिक कमजोरीका कारण आलोचना झेल्दै आएको छ। यही पृष्ठभूमिमा एन्फाले छलफल सुरु गरेको कदमलाई क्लब र खेलाडीहरूले सकारात्मक रूपमा हेरेका छन्।
एन्फाको भनाइअनुसार राष्ट्रिय लिग तथा ‘ए’ डिभिजन लिगलाई दीर्घकालीन योजना अन्तर्गत स्थिर र समयमै सञ्चालन गर्ने उद्देश्यका साथ छलफल अघि बढाइएको हो। प्रतिस्पर्धात्मक फुटबल नियमित सञ्चालन भएमा देशभरि फुटबल विकास, खेलाडीको स्तर उकास्ने, र राष्ट्रिय टोलीमा खेलाडी छनोट सहज हुने अपेक्षा राखिएको छ।
सहभागी क्लब तथा खेलाडीहरूले लिगको ढाँचा, पारदर्शिता, आर्थिक पक्ष र दीर्घकालीन योजना सम्बन्धी सुझाव राखिरहेका छन्। छलफल सम्पन्न भएपछि एन्फाले आगामी सिजनका लागि थप नीतिगत निर्णय गर्ने तयारी गरिरहेको एन्फा स्रोतले बताएको छ।
