इलाम । राष्ट्रसेवक बचत तथा ऋण सहकारी संस्था लिमिटेड, इलाम राष्ट्रिय तहको उत्कृष्ट सहकारीका रूपमा पुरस्कृत भएकाे छ। राष्ट्रिय सहकारी बैंक लिमिटेडले देशभरका बचत तथा ऋण कारोबार गर्ने सहकारी संस्थाहरूमध्ये उच्च कार्यक्षमता तथा सुशासनका आधारमा मूल्यांकन गर्दै राष्ट्रसेवक सहकारीलाई सम्मान प्रदान गरेको हो।
बैंकको २२औँ साधारणसभा, कोशी एकाइद्वारा विराटनगरमा आयोजित कार्यक्रममा संस्थालाई सम्मानपत्रसहित पुरस्कृत गरिएको थियो। सहकारी क्षेत्रको पारदर्शिता, आर्थिक अनुशासन र सदस्य हितमा केन्द्रित सेवाका कारण राष्ट्रसेवक सहकारी उत्कृष्टको रूपमा चयन गरिएको आयोजकले जानकारी दिएको छ।
संस्थाका पदाधिकारीहरूले यो सम्मान सहकारीको निरन्तर परिश्रम र सदस्यहरूको विश्वासको परिणाम भएको बताउँदै आगामी दिनमा अझ सक्षम र पारदर्शी ढंगले सेवा प्रवाह गर्ने प्रतिबद्धता व्यक्त गरेका छन्।
