सन्दकपुर (इलाम) । ४४ दशमलव २ किलोमिटर दूरीको रेडपान्डा म्याराथनमा महिलातर्फ खोटाङकी निर्मला राई प्रथम भएकी छन्। उनले ५ घन्टा ४० मिनेट ३६ सेकेन्डमा निर्धारित दूरी पार गर्दै उपाधिसहित नगद एक लाख पचास हजार रुपैयाँ पुरस्कार प्राप्त गरिन्।
महिलातर्फकै प्रतिस्पर्धामा सुनसरीकी रोकाया दोस्रो भइन्। उनले ५ घन्टा ४० मिनेट ३९ सेकेन्डमा दूरी पूरा गर्दै एक लाख रुपैयाँ हात पारिन्। कल्पना बुढा तेस्रो हुँदै ५० हजार रुपैयाँ पुरस्कार जितिन् भने राज्यलक्ष्मी शाक्य चौथो स्थानमा रहँदै २० हजार रुपैयाँ प्राप्त गर्न सफल भइन्।
स्थानीय (इलाम, पाँचथर र ताप्लेजुङ) पुरुष समूहमा पाँचथरका राजन मेन्याङ्बो प्रथम भए। उनले ४ घन्टा ३९ मिनेट १० सेकेन्डमा दूरी पार गरी २५ हजार रुपैयाँ पुरस्कार पाए। पाँचथरकै विशाल राई दोस्रो भए भने इलामका राजेन्द्र लिम्बू तेस्रो स्थानमा रहे। ताप्लेजुङका रमेश लिम्बू चौथो भए।
म्याराथन मंगलबार बिहान साढे ७ बजे इलाम बजारबाट सुरु भई सन्दकपुर डाँडामा पुगेर सम्पन्न भएको थियो। समुद्री सतहबाट करिब १ हजार ८ सय २० मिटरदेखि ३ हजार ६ सय १० मिटर उचाइसम्मको कठिन भू–भागमा प्रतियोगिता आयोजना गरिएको थियो।
विश्वमै दुर्लभ मानिने रेडपान्डा तथा जैविक विविधताको संरक्षणबारे जनचेतना फैलाउने उद्देश्यका साथ दीपज्योति युवा क्लबको आयोजनामा म्याराथन गरिएको हो। प्रतियोगितामा नेपाल र भारतका गरी ६२ पुरुष र ११ महिला धावकहरूको सहभागिता रहेको थियो। पुरुष खुलातर्फ गजेन्द्र राई पहिलो, करण रावल दोस्रो तथा कर्णवीर रोका तेस्रो भएका छन्।
