विराटनगर । साउथ एसियन स्कूल अफ टुरिज्म एण्ड होटल म्यानेजमेन्ट (सास्थम) कलेज, विराटनगरले बीबीए र बीएचएम कार्यक्रमका नवप्रवेशी विद्यार्थीलाई स्वागत गर्न कलेज परिसरमा विशेष कार्यक्रम आयोजना गरेको छ।
कार्यक्रम पूर्वाञ्चल विश्वविद्यालय व्यवस्थापन संकायका डिन डा. सन्देश दास श्रेष्ठको प्रमुख आतिथ्यतामा सम्पन्न भएको हो। प्रमुख अतिथि डा. श्रेष्ठले विद्यार्थीहरूलाई अध्ययनमा अनुशासन, सीप विकास र व्यवहारिक ज्ञानमा ध्यान दिन आग्रह गर्नुभयो। उहाँले पर्यटन तथा आतिथ्य व्यवस्थापन क्षेत्रमा दक्ष जनशक्ति उत्पादनमा सास्थम कलेजको भूमिका महत्वपूर्ण रहेको उल्लेख गर्नुभयो। साथै, कलेजले गुणस्तरीय शिक्षा प्रदान गर्दै पूर्वाञ्चल क्षेत्रमै होटल व्यवस्थापन अध्ययनमा अग्रणी संस्थाको रूपमा पहिचान बनाएको बताउनुभयो।
कार्यक्रममा कलेजका अध्ययनरत विद्यार्थीहरूले यस शैक्षिक सत्रमा बीबीए र बीएचएममा भर्ना भएका नवप्रवेशीहरूलाई सांस्कृतिक नृत्य, फेसन शो (कल्चर र्याम्प), गीत तथा विभिन्न मनोरञ्जनात्मक प्रस्तुतीमार्फत स्वागत गरेका थिए।
क्याम्पस प्रमुख विनय केसीका अनुसार शैक्षिक सत्र २०२५ मा कलेजका विभिन्न तहमा उल्लेख्य संख्यामा विद्यार्थी भर्ना भएका छन्। बीएचएमतर्फ २२औँ ब्याचमा १४४ जना, बीबीएतर्फ १७औँ ब्याचमा ९६ जना तथा एमबीएतर्फ तेस्रो ब्याचमा ३३ जना विद्यार्थी अध्ययनरत छन्। यसै वर्षदेखि कलेजले एमएचएचएम कार्यक्रम पनि सञ्चालनमा ल्याएको उहाँले जानकारी दिनुभयो।
कार्यक्रममा सास्थम कलेजका प्रबन्ध निर्देशक रोशन बहादुर थापा, क्याम्पस प्रमुख विनय केसी, प्रशासन प्रमुख राजेश गुरुङ, बीएचएम कार्यक्रम निर्देशक शैलेन्द्र गणेश, बीबीए कार्यक्रम निर्देशक केशव भण्डारी, प्लस टु को–अर्डिनेटर सुशिल खनाल, क्याम्पस व्यवस्थापक महेश्वर सिंहलगायतको उपस्थिति रहेको थियो।
