इलाम । इलामस्थित मण्टेश्वरी सेकेण्डरी स्कुलको २१औँ स्थापना दिवस तथा सम्मान कार्यक्रम २०८२ साल पुष १७ गते विविध कार्यक्रमका साथ भव्य रूपमा सम्पन्न भएको छ। विद्यालयको शैक्षिक यात्राको २१ वर्ष पूरा भएको अवसरमा आयोजित उक्त कार्यक्रममा शिक्षा, समाज र विद्यालय व्यवस्थापनसँग सम्बन्धित विभिन्न व्यक्तित्वहरूको उल्लेखनीय उपस्थिति रहेको थियो।
विद्यालय व्यवस्थापन समिति अध्यक्ष डम्बरकुमारी देवानको अध्यक्षतामा सम्पन्न कार्यक्रममा इलाम नगरपालिका शिक्षा शाखा प्रमुख राधिका घिमिरे प्रमुख अतिथिका रूपमा सहभागी हुनुहुन्थ्यो। कार्यक्रममा विद्यालयका संस्थापक गणेश राई, इलाम नगरपालिका वडा नं. ७ का वडाध्यक्ष नरेश श्रेष्ठ, वडा सदस्य बसन्ती घतानी, प्याब्सन जिल्ला समितिका वरिष्ठ उपाध्यक्ष छवि लमसाल, नगर प्याब्सन अध्यक्ष भूपाल थापा लगायत विभिन्न विद्यालयका प्रधानाध्यापक तथा शिक्षासेवीहरूको उपस्थिति रहेको थियो।
कार्यक्रमको प्रारम्भमा विद्यालयका प्रधानाध्यापक नुनुमा राईले स्वागत मन्तव्य राख्दै विद्यालयको स्थापना कालदेखि हालसम्मको शैक्षिक उपलब्धि, भौतिक पूर्वाधार विकास र विद्यार्थी केन्द्रित शिक्षण सिकाइका गतिविधिबारे प्रकाश पार्नुभयो। उहाँले विद्यालयले गुणस्तरीय शिक्षा प्रदान गर्दै समाजप्रति जिम्मेवार नागरिक उत्पादन गर्ने लक्ष्यका साथ अघि बढिरहेको उल्लेख गर्नुभयो।
कार्यक्रममा बोल्ने क्रममा वडाध्यक्ष नरेश श्रेष्ठ, प्याब्सन जिल्ला समितिका वरिष्ठ उपाध्यक्ष छवि लमसाल, नगर प्याब्सन अध्यक्ष भूपाल थापा, विद्यालयका संस्थापक गणेश राई तथा प्रमुख अतिथि राधिका घिमिरेले विद्यालयको निरन्तर प्रगतिप्रति शुभकामना व्यक्त गर्नुभयो। वक्ताहरूले निजी तथा संस्थागत विद्यालयले शैक्षिक गुणस्तर अभिवृद्धिमा खेलेको भूमिकाको प्रशंसा गर्दै आगामी दिनमा अझ प्रभावकारी र व्यवहारिक शिक्षा प्रदान गर्न आग्रह गर्नुभयो।
स्थापना दिवसको अवसरमा विद्यालयमा १० वर्षभन्दा बढी समयदेखि निरन्तर सेवा गर्दै आउनु भएकी शिक्षिका इन्दिरा देवानलाई विशेष सम्मान गरिएको थियो। लामो समयसम्म विद्यालयको शैक्षिक उन्नयनमा योगदान पुर्याएको कदरस्वरूप उहाँलाई सम्मानपत्रसहित सम्मान प्रदान गरिएको विद्यालयले जनाएको छ।
त्यसैगरी, शैक्षिक सत्रभर सञ्चालन गरिएका अतिरिक्त क्रियाकलापमा उत्कृष्ट प्रदर्शन गर्ने विद्यार्थीहरूलाई पुरस्कार वितरण गरिएको थियो। विद्यार्थीहरूको प्रतिभा पहिचान र हौसला अभिवृद्धि गर्ने उद्देश्यले विभिन्न विधामा उत्कृष्ट छात्रछात्रालाई सम्मान गरिएको हो।
कार्यक्रमको अवसरमा विद्यार्थीहरूले विभिन्न सांस्कृतिक नृत्य, गीत तथा प्रस्तुतिहरू प्रस्तुत गरी कार्यक्रमलाई अझ आकर्षक बनाएका थिए। विद्यार्थीहरूको उत्साहपूर्ण सहभागिताले विद्यालयको शैक्षिक वातावरणसँगै सिर्जनात्मक क्षमता पनि उजागर भएको सहभागीहरूले बताएका छन्।
२१औँ स्थापना दिवस समारोहले विद्यालय, अभिभावक, शिक्षक तथा विद्यार्थीबीचको सम्बन्धलाई अझ सुदृढ बनाएको जनाउँदै विद्यालय व्यवस्थापनले आगामी दिनमा अझ गुणस्तरीय, व्यवहारिक र जीवनोपयोगी शिक्षा प्रदान गर्ने प्रतिबद्धता व्यक्त गरेको छ।
