तेज कठेत
इलाम । इलाम जिल्लाको माईजोगमाई गाउँपालिका–६ स्थित प्याङको थुम्के रानी क्षेत्रमा पहिलोपटक किसानहरूले स्कुसको जरा उत्पादन गर्न सफलता प्राप्त गरेका छन् । यस क्षेत्रका किसानका लागि यो नयाँ उपलब्धि मानिएको छ, किनकि यसअघि यहाँ स्कुसको जरा मात्र होइन, स्कुसको बोटसमेत फल्ने गरेको थिएन ।
स्थानीय किसानहरूको पहल र मेहनतपछि हाल उक्त क्षेत्रमा स्कुसको खेती राम्रोसँग फस्टाउँदै गएको छ । सुरुमा परीक्षणका रूपमा लगाइएको स्कुस अहिले उत्पादन दिन थालेपछि किसानहरू उत्साहित बनेका छन् । यसले नगदे बालीका रूपमा स्कुसको सम्भावना देखाएको स्थानीयको भनाइ छ ।
समुद्री सतहदेखि करिब २ हजारदेखि २ हजार ४ सय मिटर उचाइमा अवस्थित यस क्षेत्रको हावापानी स्कुस खेतीका लागि उपयुक्त बन्दै गएको देखिएको छ । पहिले अनुपयुक्त ठानिएको भूभागमा पनि खेती सम्भव भएपछि स्थानीय किसानहरू अन्य तरकारी तथा नगदे बालीतर्फ आकर्षित हुन थालेका छन् ।
किसानहरूका अनुसार स्कुसको सफल उत्पादनले आयआर्जनको नयाँ बाटो खोल्ने विश्वास बढाएको छ । आगामी दिनमा क्षेत्र विस्तार गर्दै व्यावसायिक रूपमा खेती गर्न सके स्थानीय अर्थतन्त्रमा सकारात्मक प्रभाव पर्ने अपेक्षा गरिएको छ ।
