इलाम। इलाम जिल्लाको रोङ गाउँपालिका–६ स्थित जिर्मले स्वास्थ्य चौकीमा अब प्रयोगशाला (ल्याब) सेवा सञ्चालनमा आएको छ। यससँगै स्थानीय बासिन्दाले सामान्यदेखि अत्यावश्यक स्वास्थ्य परीक्षणका लागि अब टाढा जानुपर्ने बाध्यता अन्त्य भएको छ।
नवसञ्चालित प्रयोगशालामार्फत क्षयरोगको खकार परीक्षण, औलोका लागि रक्त नमुना संकलन तथा परीक्षण, गर्भावस्था परीक्षण, रक्तचाप र मधुमेह जाँचलगायत ३२ भन्दा बढी प्रकारका स्वास्थ्य परीक्षण सेवा उपलब्ध गराइएको स्वास्थ्य चौकीले जनाएको छ। यसअघि यी सेवाका लागि बिरामीहरू झापाको बौद्धमोडलगायतका स्थानमा जानुपर्ने अवस्था थियो।
स्वास्थ्य चौकी सञ्चालन तथा व्यवस्थापन समिति र जिर्मले स्वास्थ्य चौकी सुधार तथा संरक्षण समितिको संयुक्त बैठकले प्रयोगशाला सेवा सुरु गर्ने निर्णय गरेपछि सेवा औपचारिक रूपमा सञ्चालनमा ल्याइएको स्वास्थ्य चौकी इन्चार्ज दिलीप उराउले जानकारी दिए। उनका अनुसार रोङ गाउँपालिकाको समन्वय र सहयोगमा ल्याब सेवा सञ्चालनमा ल्याइएको हो।
यसअघि फिजियोथेरापी सेवा सञ्चालन हुँदै आएको यस स्वास्थ्य चौकीले सेवा विस्तारलाई निरन्तरता दिँदै प्रयोगशाला सेवा थप गरेको इन्चार्ज उराउले बताए। “अपाङ्गता भएका तथा दीर्घरोगी बिरामीलाई लक्षित गरी फरक र प्रभावकारी स्वास्थ्य सेवा दिनेतर्फ हामीले प्रयास गरिरहेका छौं,” उनले भने।
रोङ गाउँपालिका–६ का वडाध्यक्ष सत्यम राईसहित जनप्रतिनिधि, स्वास्थ्यकर्मी तथा कर्मचारीहरूको निरन्तर पहलका कारण स्वास्थ्य चौकीमा नयाँ सेवा थप्न सम्भव भएको स्वास्थ्य चौकीले जनाएको छ। स्थानीयस्तरमै गुणस्तरीय सेवा विस्तार गर्न सबै पक्षको सहकार्य महत्वपूर्ण रहेको उनीहरूको भनाइ छ।
स्वास्थ्य चौकी व्यवस्थापन समिति सदस्य दलबहादुर योञ्जनका अनुसार यसअघिसम्म प्रयोगशाला सेवा लिन बिरामीले जिल्ला बाहिर जानुपर्ने अवस्था थियो। “अब गाउँमै परीक्षण सेवा उपलब्ध हुँदा स्थानीयवासी निकै खुसी छन्, बिरामीले छिटो र सहज रूपमा सेवा पाउने भएका छन्,” उनले भने।
यस्तै, यस स्वास्थ्य चौकीबाट टोलस्तरीय स्वास्थ्य सेवा शिविर सञ्चालन तथा महिला स्वास्थ्य स्वयंसेविका परिचालन कार्यक्रमसमेत भइरहेको हेल्थ असिस्टेन्ट सुष्मा लिम्बूले जानकारी दिइन्। उनका अनुसार स्वयंसेविकालाई रक्तचाप जाँच गर्ने तालिम दिई घर–घरमै आधारभूत स्वास्थ्य सेवा पुर्याउने कामसमेत भइरहेको छ।
ल्याब टेक्निसियन अप्सना खवासका अनुसार जिर्मले स्वास्थ्य चौकीमा मासिक रूपमा आयुर्वेदिक स्वास्थ्य शिविरसमेत सञ्चालन हुँदै आएको छ। आधुनिक र परम्परागत दुवै प्रकारका स्वास्थ्य सेवालाई समेटेर सेवा प्रवाह गरिँदा स्थानीय समुदायको स्वास्थ्य अवस्थामा सकारात्मक सुधार आउने अपेक्षा गरिएको छ।
