इलाम माङसेबुङ । माङसेबुङ गाउँपालिका स्तरीय १६औँ राष्ट्रपति रनिङ शिल्ड प्रतियोगिता २०८२ सफलतापूर्वक सम्पन्न भएको छ। माङसेबुङ गाउँपालिकाको आयोजना तथा माङसेबुङ–३ स्थित दुर्गा माध्यमिक विद्यालयको व्यवस्थापनमा सञ्चालन भएको प्रतियोगिता तीन दिनसम्म पुष २४, २५ र २६ गते सम्पन्न भएको हो।
विद्यार्थीहरूमा खेलकुदप्रतिको रुचि बढाउने, प्रतिभा पहिचान गर्ने र स्वस्थ प्रतिस्पर्धाको संस्कार विकास गर्ने उद्देश्यसहित आयोजना गरिएको उक्त प्रतियोगितामा गाउँपालिका भित्रका ९ वटा विद्यालयहरूको उत्साहजनक सहभागिता रहेको थियो। विभिन्न खेल विधामा विद्यार्थीहरूले उत्कृष्ट प्रदर्शन गर्दै खेल भावना र अनुशासनको उदाहरण प्रस्तुत गरेका थिए।
प्रतियोगिताको समग्र नतिजाअनुसार सरस्वती माध्यमिक विद्यालय माङसेबुङ–५ प्रथम स्थान हासिल गर्न सफल भएको छ। त्यसैगरी महेन्द्रोदय माध्यमिक विद्यालय माङसेबुङ–१ ले द्वितीय स्थान प्राप्त गरेको छ भने विद्या सिर्जनात्मक माध्यमिक विद्यालय माङसेबुङ–४ तृतीय स्थानमा रह्यो। आयोजक विद्यालय दुर्गा माध्यमिक विद्यालय माङसेबुङ–३ ले चौथो स्थानमा रहँदै प्रतिस्पर्धालाई थप रोचक बनाएको थियो।
प्रतियोगिताको समापन कार्यक्रममा उत्कृष्ट प्रदर्शन गर्ने विद्यालय तथा खेलाडीहरूलाई पुरस्कार, प्रमाणपत्र र सम्मान प्रदान गरिएको थियो। साथै आगामी वर्ष आयोजना हुने राष्ट्रपति रनिङ शिल्ड प्रतियोगिताका लागि इभाङ माध्यमिक विद्यालय माङसेबुङ–२ लाई औपचारिक रूपमा झण्डा हस्तान्तरण गरिएको छ, जसले निरन्तरता र सहकार्यको सन्देश दिएको आयोजकले जनाएको छ।
कार्यक्रमका अवसरमा स्थानीय जनप्रतिनिधि, विद्यालय व्यवस्थापन समिति, शिक्षक, अभिभावक तथा विद्यार्थीहरूको उल्लेख्य उपस्थिति रहेको थियो। वक्ताहरूले खेलकुदले शारीरिक स्वास्थ्यसँगै अनुशासन, नेतृत्व क्षमता र आपसी सद्भाव विकासमा महत्वपूर्ण भूमिका खेल्ने उल्लेख गर्दै यस्ता प्रतियोगितालाई निरन्तरता दिनुपर्नेमा जोड दिएका थिए।
आयोजक पक्षका अनुसार राष्ट्रपति रनिङ शिल्डजस्ता प्रतियोगिताले गाउँपालिका स्तरमै खेल प्रतिभा पहिचान गर्न मद्दत पुग्नुका साथै विद्यार्थीहरूलाई प्रदेश र राष्ट्रिय स्तरका प्रतियोगिताका लागि तयारी गर्ने अवसर प्रदान गर्ने विश्वास व्यक्त गरिएको छ।
