काठमाडौँ । नेपाल पत्रकार महासङ्घ दक्षिण कोरिया शाखाको नयाँ नेतृत्व सर्वसम्मत रूपमा चयन भएको छ। कोरियाको राजधानी सउलमा आइतबार सम्पन्न शाखाको अधिवेशनअन्तर्गत बन्दसत्रबाट नयाँ कार्यसमिति निर्विरोध चयन गरिएको हो।
अधिवेशनमा शाखाका कुल २७ सदस्यहरूमध्ये १९ जनाको सक्रिय सहभागिता रहेको थियो। सहभागी सदस्यहरूको सहमतिमा सन्तोष खड्कालाई अध्यक्ष पदमा चयन गरिएको छ।
त्यसैगरी महिला उपाध्यक्षमा सबिना कार्की, खुला उपाध्यक्षमा कोकिल पौडेल, सचिवमा बासुदेव भट्ट तथा समावेशी सहसचिवमा राजकुमार तामाङ चयन भएका छन्। नवगठित कार्यसमितिको कोषाध्यक्षमा प्रमिला बुढाथोकी चयन भएकी छन् भने सदस्यहरूमा सुमन कार्की र शिवबहादुर कार्की चयन भएका छन्।
यसैगरी, केन्द्रीय परिषद् सदस्यमा केशव पोख्रेल सर्वसम्मत रूपमा चयन भएका छन्। नयाँ कार्यसमितिले कोरियामा कार्यरत नेपाली पत्रकारहरूको हकहित, क्षमता अभिवृद्धि तथा संस्थागत सुदृढीकरणमा सक्रिय भूमिका निर्वाह गर्ने अपेक्षा गरिएको छ।
अधिवेशनको उद्घाटन सत्रमा भर्चुअल माध्यमबाट नेपाल पत्रकार महासङ्घका केन्द्रीय अध्यक्ष निर्मला शर्मालगायत वरिष्ठ उपाध्यक्ष दीपक आचार्यले शुभकामना मन्तव्य व्यक्त गर्नुभएको थियो। खुला सत्रमा केन्द्रीय प्रतिनिधिका रूपमा नेपाल पत्रकार महासङ्घ जापान शाखाका अध्यक्ष रविन्द्र श्रेष्ठको पनि सहभागिता रहेको थियो।
उद्घाटन सत्रमा दक्षिण कोरियामा क्रियाशील विभिन्न नेपाली सङ्घ–संस्थाका प्रतिनिधिहरूको उल्लेखनीय उपस्थिति रहेको थियो। उपस्थित अतिथिहरूले नयाँ नेतृत्वलाई सफल कार्यकालको शुभकामना व्यक्त गर्दै प्रवासी पत्रकारितालाई थप सशक्त बनाउँदै लैजानुपर्नेमा जोड दिएका थिए।
