फाकफोकथुम गाउँपालिका–३ स्थित आमचोकमा सम्पन्न ‘एफसी चौथो संस्करण सिरिजंगा स्मृति खुला फुटबल प्रतियोगिता’को उपाधि आमचोक एफसीले जितेको छ। रातमाटेमा अवस्थित सिरिजंगा स्मृति खेलमैदानमा पौष २९ गतेदेखि सुरु भएको प्रतियोगिता शुक्रबार भव्य रूपमा सम्पन्न भएको हो।
खुला ९–ए–साइड नकआउट ढाँचामा सञ्चालन गरिएको पुरुष फुटबल प्रतियोगिताको फाइनल खेल अत्यन्तै प्रतिस्पर्धात्मक बनेको थियो। निर्धारित समयमा आमचोक एफसी र आयोजक सिरिजंगा एफसीबीच १–१ गोलको बराबरी भएपछि खेल ट्राइबेकरमा पुगेको थियो। ट्राइबेकरमा आमचोक एफसीले ५–४ गोलको नाटकीय जित निकाल्दै च्याम्पियन बन्न सफल भयो। घरेलु मैदानमै उपाधि जित्ने लक्ष्य लिएको सिरिजंगा एफसी उपविजेतामा सीमित रह्यो।
उपाधिसँगै आमचोक एफसीले नगद ५५ हजार रुपैयाँ, ट्रफी, मेडल तथा प्रमाणपत्र प्राप्त गरेको छ। उपविजेता बनेको सिरिजंगा एफसीले नगद ३० हजार रुपैयाँसहित ट्रफी, मेडल र प्रमाणपत्र हात पारेको छ। विजेता तथा उपविजेता टोलीलाई फाकफोकथुम गाउँपालिका अध्यक्ष दिपेन्द्र खनालले पुरस्कार वितरण गर्दै खेलकुदले युवालाई सकारात्मक दिशातर्फ उन्मुख गराउने उल्लेखनीय माध्यम भएको बताए।
प्रतियोगिताका विभिन्न व्यक्तिगत विधातर्फ पनि खेलाडीहरू पुरस्कृत भएका छन्। आमचोक एफसीका पुजन राई प्रतियोगिताका उत्कृष्ट खेलाडी घोषित भए भने सिरिजंगा एफसीका मणि थेगिम उत्कृष्ट डिफेन्डर चुनिए। त्यस्तै बुद्ध विगिनीङ रविका अनित मगर सर्वाधिक गोलकर्ता घोषित हुँदा आमचोक एफसीका समिर लिम्बू उत्कृष्ट गोलरक्षकको उपाधि जित्न सफल भए।
कार्यक्रम सञ्चालक आइन्द्र थेगिमका अनुसार प्रतियोगिता सिरिजंगा सांस्कृतिक क्लबको आयोजनामा सम्पन्न भएको हो। प्रतियोगितामा फाकफोकथुम गाउँपालिकाको प्राविधिक सहयोग तथा वडा नं. ३, रातमाटेको सहकार्य रहेको थियो।
खेलसँगै माघ २ गते स्थानीय तथा राष्ट्रिय कलाकारहरूको सहभागितामा बृहत् सांस्कृतिक कार्यक्रमसमेत आयोजना गरिएको थियो, जसले स्थानीय समुदायमा थप उत्साह थपेको थियो।
सिरिजंगा सांस्कृतिक क्लबका अध्यक्ष मचिन्द्र नेम्वाङले प्रतियोगिताले ग्रामीण क्षेत्रमा खेलकुदको विकास, प्रतिभा पहिचान तथा युवालाई अनुशासित र सक्रिय बनाउने कार्यमा महत्वपूर्ण योगदान पुर्याएको बताए। आगामी दिनमा प्रतियोगितालाई अझ व्यवस्थित र व्यापक बनाउँदै लैजाने योजना रहेको पनि उनले जानकारी दिए।
फोटोः स्पोर्स नेपालबाट
