‘मगमग बसना’ लिएर फेरि दर्शकमाझ सरगम राई

रबिबजार न्युज

माघ ११, २०८२ मा प्रकाशित

काठमाडौं । गायक तथा सर्जक सरगम राईको नयाँ सांगीतिक सिर्जना ‘मगमग बसना’ सार्वजनिक भएको छ। सरगम राईकै स्वर, शब्द र संगीतमा तयार भएको यो गीत आरजिटी फिल्म्सको आधिकारिक युट्युब च्यानलमार्फत दर्शक–श्रोतामाझ ल्याइएको हो।

प्रेम, सकारात्मक ऊर्जा र उत्साहपूर्ण भावनालाई केन्द्रमा राखेर तयार गरिएको ‘मगमग बसना’ ले समकालीन नेपाली गीत–संगीतमा फरक स्वाद दिने अपेक्षा गरिएको छ। गीतमा प्रेमको सुगन्ध, मन छुने भाव र सरल शब्द संयोजनले श्रोताको मन जित्ने विश्वास गरिएको छ।

गीतको संगीत संयोजन (एरेन्जमेन्ट) बादल लिम्बुले गरेका हुन्। यसअघि पनि सरगम राईका सिर्जनाहरूले श्रोतामाझ राम्रो स्थान बनाइसकेका छन्। ‘खुशी साटौँ जुनी काटौँ’, ‘माया गाढा छ’, ‘पाती चढाउँला’ र ‘दुई मुटु’ जस्ता गीतहरू उनका लोकप्रिय रचनामध्ये पर्दछन्।

म्युजिक भिडियो पक्ष पनि सबल

‘मगमग बसना’ को म्युजिक भिडियो पनि आकर्षक बनेको छ। भिडियोको छायांकन दिनेश पराजुलीले गरेका छन् भने सम्पादन विकास दाहालले गरेका हुन्। भिडियोको कथा तथा निर्देशन सोनम पाख्रिनले सम्हालेका छन्।

भिडियोमा कलाकार बुद्धि तामाङ, बेदना राई र राज दोङको अभिनय देख्न सकिन्छ। कलाकारहरूको स्वाभाविक अभिनय र कथानकले गीतको भावनालाई अझ सशक्त बनाएको छ।

संगीत, शब्द र दृश्यको राम्रो संयोजन रहेको ‘मगमग बसना’ दर्शक–श्रोताका लागि नयाँ अनुभूति दिने विश्वास गरिएको छ। गीतको म्युजिक भिडियो हाल आरजिटी फिल्म्सको युट्युब च्यानलमा उपलब्ध छ।