काठमाडौं — सर्वोच्च अदालतका न्यायाधीश डा. मनोज शर्मा नेपालको प्रधानन्यायाधीश पदका लागि सिफारिस भएका छन्। न्यायपरिषद्को बिहीबार बसेको बैठकले उनको नाम आगामी प्रधानन्यायाधीशका रूपमा अघि सारेको हो।
सिफारिस प्रक्रिया अनुसार संसदीय सुनुवाइ समितिबाट अनुमोदन भएपछि डा. शर्मा नेपालको ३३औँ प्रधानन्यायाधीश बन्नेछन्।
न्यायपरिषद्ले वरिष्ठतम् न्यायाधीशको सट्टा चौथो वरियताक्रममा रहेका शर्मालाई सिफारिस गरेको यो पहिलो पटक भएको मानिएको छ, जसलाई न्यायिक इतिहासमा उल्लेखनीय घटनाका रूपमा हेरिएको छ।
६ वैशाख २०७६ मा सर्वोच्च अदालतको न्यायाधीशमा नियुक्त भएका शर्मा संसदीय सुनुवाइबाट अनुमोदन भएमा करिब पूर्ण कार्यकाल अर्थात् ६ वर्ष प्रधानन्यायाधीशको जिम्मेवारी सम्हाल्ने अवसर पाउनेछन्।
हाल कार्यवाहक प्रधानन्यायाधीश सपना प्रधान मल्ल, वरिष्ठतम् न्यायाधीश कुमार रेग्मी र हरि फुयाललाई पछि पार्दै उनलाई सिफारिस गरिएको हो।
पर्सा जिल्लामा ४ असार २०२७ मा जन्मिएका शर्मा ३ असार २०९२ मा ६५ वर्ष उमेर पूरा गर्नेछन्। नेपालको न्यायिक इतिहासमा विगतका प्रधानन्यायाधीशहरूले पूर्ण ६ वर्षे कार्यकाल पूरा गर्न नसकेको अवस्था रहँदै आएको छ।
संसदीय सुनुवाइपछि उनको नियुक्ति औपचारिक रूपमा अघि बढ्नेछ।
