काठमाडौं — सरकारले आगामी आर्थिक वर्षको नीति तथा कार्यक्रम पारित गर्ने उद्देश्यसहित मन्त्रिपरिषद् बैठक आह्वान गरेको छ।
प्रधानमन्त्रीको नेतृत्वमा सोमबार बिहान साढे १० बजे सिंहदरबारस्थित प्रधानमन्त्री तथा मन्त्रिपरिषद् कार्यालयमा बैठक बस्ने भएको हो। बैठकमा आगामी आर्थिक वर्षको नीति तथा कार्यक्रमलाई अन्तिम रूप दिई स्वीकृति प्रदान गर्ने मुख्य एजेन्डा रहेको सरकारका प्रवक्ता तथा शिक्षामन्त्री सस्मित पोखरेलले जानकारी दिनुभएको छ।
सरकारले तयार पारेको नीति तथा कार्यक्रम आजै संघीय संसदमा प्रस्तुत गरिने तयारी पनि गरिएको छ। राष्ट्रपति रामचन्द्र पौडेलले संसदको संयुक्त बैठकमा उक्त नीति तथा कार्यक्रम औपचारिक रूपमा प्रस्तुत गर्ने कार्यक्रम रहेको छ।
नीति तथा कार्यक्रम सरकारको वार्षिक योजना, प्राथमिकता र विकास रणनीति निर्धारण गर्ने महत्वपूर्ण दस्तावेज मानिन्छ। त्यसैले मन्त्रिपरिषद्को आजको बैठकलाई महत्वपूर्ण रूपमा हेरिएको छ।
बैठकले विभिन्न नीतिगत विषयमा समेत छलफल गरी आवश्यक निर्णय गर्ने अपेक्षा गरिएको छ।
