विराटनगर — नेपाल बीमा प्राधिकरणको ५८औँ वार्षिकोत्सवको अवसरमा कोशी प्रदेश कार्यालयले सामाजिक उत्तरदायित्वअन्तर्गत रक्तदान कार्यक्रम तथा निःशुल्क स्वास्थ्य शिविर आयोजना गरेको छ। विराटनगरमा सम्पन्न उक्त कार्यक्रममा सर्वसाधारणको उत्साहजनक सहभागिता देखिएको आयोजकले जनाएको छ।
मानवीय सेवा, स्वास्थ्य सचेतना तथा सामाजिक सहकार्यलाई प्रवर्द्धन गर्ने उद्देश्यले आयोजित कार्यक्रममा विभिन्न स्वास्थ्य सेवा प्रदान गरिएको थियो। कार्यक्रममा कुल १७८ जनाले सेवा लिएका थिए। तीमध्ये ६५ जनाले रक्तदान गरेका थिए भने १०९ जनाले आँखा परीक्षण तथा ४३ जनाले दन्त परीक्षण सेवा प्राप्त गरेका थिए।
कार्यक्रममा सहभागीहरूलाई निःशुल्क रूपमा आँखा तथा दाँत परीक्षण सेवा उपलब्ध गराइएको थियो। स्वास्थ्य परीक्षणमार्फत सर्वसाधारणलाई प्रारम्भिक स्वास्थ्य अवस्थाबारे जानकारी गराउनुका साथै समयमै उपचारतर्फ सचेत गराउने उद्देश्य रहेको आयोजकले जनाएको छ।
नेपाल बीमा प्राधिकरणले वार्षिकोत्सवलाई केवल औपचारिक कार्यक्रममा सीमित नराखी सामाजिक सेवासँग जोड्ने प्रयास गर्दै आएको जनाएको छ। प्राधिकरणका अनुसार यस्ता कार्यक्रमले समुदायसँगको सम्बन्ध थप सुदृढ बनाउन सहयोग पुग्ने विश्वास लिइएको छ।
कार्यक्रम सफल बनाउन नेपाल रेडक्रस सोसाइटी कोशी प्रदेश, हिमाल आँखा अस्पताल तथा शान्ति फर्मेसी एण्ड डेन्टल क्लिनिक विराटनगरले सहकार्य गरेका थिए। सहभागीहरूले यस्ता सामाजिक तथा स्वास्थ्यसम्बन्धी कार्यक्रमले स्थानीय समुदायलाई प्रत्यक्ष लाभ पुगेको प्रतिक्रिया दिएका छन्।
नेपाल बीमा प्राधिकरण कोशी प्रदेश प्रमुख ले सामाजिक उत्तरदायित्वलाई प्राथमिकतामा राख्दै आगामी दिनमा पनि समुदाय केन्द्रित कार्यक्रमलाई निरन्तरता दिइने बताउनुभयो। उहाँले स्वास्थ्य, मानवीय सेवा र सामाजिक सहकार्यलाई प्रवर्द्धन गर्ने यस्ता अभियानले संस्थाप्रति जनविश्वास थप मजबुत बनाउने विश्वास व्यक्त गर्नुभयो।
