विराटनगर । तेजस्वी बचत तथा ऋण सहकारी संस्था लिमिटेड, विराटनगर–५ त्रिमूर्ति चोकको आयोजनामा सदस्य शिक्षा तथा अन्तरक्रिया कार्यक्रम सम्पन्न भएको छ। कार्यक्रमको मुख्य उद्देश्य सदस्यहरूलाई सहकारी प्रणाली, बचतको सुरक्षित उपयोग तथा वित्तीय सचेतनाबारे जानकारी गराउनु रहेको थियो।
कार्यक्रममा सहभागी सदस्यहरूलाई सहकारीमार्फत गरिने आर्थिक कारोबारलाई सुरक्षित, व्यवस्थित र प्रभावकारी बनाउन आवश्यक आधारभूत ज्ञान प्रदान गरिएको थियो। साथै बचतलाई सही तरिकाले उपयोग गर्ने उपाय, वित्तीय अनुशासनको महत्व तथा सहकारीसम्बन्धी प्रचलित ऐन, नियम र कानुनी प्रावधानबारे विस्तृत जानकारी दिइएको थियो।
संस्थाका अध्यक्ष देवी प्रसाद चुडालले सहकारीको वर्तमान अवस्था, गतिविधि र उपलब्धिहरूबारे जानकारी दिँदै संस्थामा हाल ७१८ जना शेयर सदस्य आवद्ध रहेको बताए। उनका अनुसार संस्थाको कुल बचत रकम हाल ९ करोड ५६ लाख रुपैयाँ पुगेको छ। उनले सदस्यहरूको निरन्तर विश्वास र सक्रिय सहभागिताका कारण सहकारी सुदृढ हुँदै गएको उल्लेख गरे।
कार्यक्रममा लेखा समिति संयोजक मणीराज प्रसाईं तथा सहकारीका सल्लाहकार केदार कार्कीले सहकारीको पारदर्शिता, उत्तरदायित्व र सदस्यको भूमिकाबारे आफ्नो धारणा प्रस्तुत गरे।
त्यसैगरी प्रशिक्षक गोमा सापकोटा र टंक प्रसाद गौत्तमले सहकारीमा नियमित बचत, वित्तीय अनुशासन र सक्रिय सहभागिताले व्यक्तिगत तथा सामुदायिक आर्थिक विकासमा सकारात्मक प्रभाव पार्ने बताएका थिए।
कार्यक्रममा सहभागी सदस्यहरूले सहकारीसम्बन्धी विभिन्न जिज्ञासा राखेका थिए भने प्रशिक्षकहरूले तिनको समाधानसमेत गरेका थिए।
सहकारीले यस्ता कार्यक्रमले सदस्यहरूलाई वित्तीय रूपमा सशक्त बनाउने र संस्थाप्रति विश्वास थप मजबुत हुने अपेक्षा गरिएको जनाएको छ।
