इलाम । सन्दकपुर गाउँपालिकाले युवा तथा विद्यार्थीलाई आधुनिक सूचना प्रविधिसँग परिचित गराउने उद्देश्यले आयोजना गरेको तीनदिने सूचना प्रविधि प्रयोग तथा क्षमता विकास तालिम सम्पन्न भएको छ। गाउँपालिकाको सभाहलमा सञ्चालन गरिएको तालिममा वडा नं. १, २ र ३ का ५२ भन्दा बढी युवा तथा विद्यार्थीहरूको सहभागिता रहेको थियो।
डिजिटल युगसँगै प्रविधिको प्रयोग दैनिक जीवन, शिक्षा, रोजगारी तथा व्यवसायका क्षेत्रमा अपरिहार्य बन्दै गइरहेका बेला युवाहरूलाई प्रविधिमैत्री बनाउने लक्ष्यसहित तालिम सञ्चालन गरिएको गाउँपालिकाले जनाएको छ। तालिमका क्रममा सहभागीहरूलाई सूचना प्रविधिको आधारभूत ज्ञानदेखि आधुनिक डिजिटल उपकरणहरूको प्रयोगसम्मका विषयमा जानकारी प्रदान गरिएको थियो।
कार्यक्रममा डिजिटल प्रविधिको परिचय, प्रविधिको सही प्रयोगबाट प्राप्त हुने अवसर र फाइदा, सामाजिक सञ्जालको सुरक्षित तथा जिम्मेवार प्रयोग, साइबर अपराध र कानुनी व्यवस्था सम्बन्धी विषयमा प्रशिक्षण दिइएको थियो। साथै कृत्रिम बुद्धिमत्ता (Artificial Intelligence–AI) का विभिन्न प्रकार, यसको प्रयोग, सम्भावना र भविष्यमा यसको प्रभावका बारेमा समेत विस्तृत जानकारी प्रदान गरिएको थियो।
तालिममा सहभागी युवाहरूले आधुनिक प्रविधिको प्रयोगबारे व्यवहारिक तथा सैद्धान्तिक ज्ञान प्राप्त गरेको बताएका छन्। उनीहरूले विशेषगरी सामाजिक सञ्जालको सुरक्षित प्रयोग, डिजिटल सुरक्षा तथा कृत्रिम बुद्धिमत्ताको उपयोगसम्बन्धी विषय अत्यन्त उपयोगी रहेको प्रतिक्रिया दिएका थिए।
गाउँपालिकाका अनुसार यस्ता कार्यक्रमले ग्रामीण क्षेत्रका युवाहरूलाई प्रविधिसँग जोड्न, डिजिटल साक्षरता अभिवृद्धि गर्न तथा भविष्यका अवसरहरू पहिचान गर्न सहयोग पुग्ने अपेक्षा गरिएको छ। साथै सूचना प्रविधिको सही प्रयोगमार्फत शिक्षा, उद्यमशीलता र रोजगारीका नयाँ सम्भावनाहरू सिर्जना गर्न पनि यस्ता तालिम प्रभावकारी हुने विश्वास व्यक्त गरिएको छ।
सन्दकपुर गाउँपालिकाले आगामी दिनमा पनि युवाको क्षमता विकास, सीप अभिवृद्धि तथा प्रविधिमैत्री समाज निर्माणका लागि यस्ता कार्यक्रमलाई निरन्तरता दिने जनाएको छ। स्थानीय तहको यस्तो पहलले ग्रामीण क्षेत्रका युवालाई आधुनिक ज्ञान र सीपसँग जोड्दै प्रतिस्पर्धी र सक्षम जनशक्ति उत्पादनमा टेवा पुग्ने अपेक्षा गरिएको छ।
