इलाम । ‘सूचनाको हक तथा नागरिकको अधिकार’ कार्यक्रम केही समयका लागि स्थगित गरिएको सम्बन्धमा
रवि बजार न्युजद्वारा सञ्चालित ‘सूचनाको हक तथा नागरिकको अधिकार’ कार्यक्रम अन्तर्गत हामीले इलाम जिल्लाभरिका माध्यमिक विद्यालयहरूमा निःशुल्क जनचेतनामूलक कार्यक्रम सञ्चालन गर्दै आएका थियौँ।
वि.सं. २०८३ साल जेठ १८ गतेबाट सुरु गरिएको यस अभियानअन्तर्गत हालसम्म माइजोगमाई गाउँपालिका र सन्दकपुर गाउँपालिकाका अधिकांश माध्यमिक विद्यालयहरूमा कार्यक्रम सफलतापूर्वक सम्पन्न गरिएको छ। त्यसैगरी रोङ गाउँपालिका तथा सूर्योदय नगरपालिकाका केही माध्यमिक विद्यालयहरूमा समेत कार्यक्रम सञ्चालन गरिएको छ।
यस अभियानमार्फत विद्यालयमा रहेका शैक्षिक, भौतिक तथा व्यवस्थापकीय चुनौतीहरू, साथै विद्यार्थीहरूले भोगिरहेका विविध समस्याहरूको प्रत्यक्ष रूपमा जानकारी सङ्कलन गर्दै सम्बन्धित पक्षसम्म आवाज पुर्याउने उद्देश्यका साथ निःशुल्क कार्यक्रम सञ्चालन गरिएको थियो।
तर, हाल देशभर मनसुन सक्रिय भई लगातार वर्षा, बाढी तथा पहिरोको जोखिम बढिरहेका कारण हाम्रो टोलीको आन्तरिक छलफलबाट बर्खायामभरका लागि उक्त कार्यक्रम अस्थायी रूपमा स्थगित गर्ने निर्णय गरिएको जानकारी गराउन चाहन्छौँ।
मौसम अनुकूल भई यात्रा तथा कार्यक्रम सञ्चालनका लागि सहज वातावरण बनेलगत्तै हामी पुनः इलाम जिल्लाभरिका बाँकी माध्यमिक विद्यालयहरूमा पुगेर यस अभियानलाई निरन्तरता दिनेछौँ। हाम्रो उद्देश्य शिक्षा, सूचना र नागरिक अधिकारका विषयमा जनचेतना अभिवृद्धि गर्नुका साथै विद्यार्थी तथा विद्यालयका वास्तविक समस्यालाई सम्बन्धित निकायसम्म पुर्याउने नै रहनेछ।
यस अभियानलाई सफल बनाउन माइजोगमाई गाउँपालिका, सन्दकपुर गाउँपालिका, रोङ गाउँपालिका तथा सूर्योदय नगरपालिकाका आदरणीय शिक्षक–शिक्षिका, विद्यालय परिवार, विद्यार्थी भाइबहिनी, स्थानीय जनप्रतिनिधि, शुभेच्छुक तथा आर्थिक, भौतिक र नैतिक रूपमा सहयोग गर्नुहुने सम्पूर्ण महानुभावहरूप्रति रवि बजार न्युज परिवार हार्दिक आभार तथा कृतज्ञता व्यक्त गर्दछ।
यहाँहरूको निरन्तर साथ, सहयोग र विश्वासले नै हाम्रो अभियानलाई अझ प्रभावकारी बनाएको छ। आगामी दिनहरूमा पनि यस्तै साथ र सहयोगको अपेक्षा राखेका छौँ।
धन्यवाद।
– रवि बजार न्युज परिवार
