काठमाडौँ, असार १५। गायिका इन्दिरा जोशीको नयाँ गीत ‘सेन्सेसन’ सार्वजनिक भएको छ। आधुनिक आइटम शैलीमा तयार गरिएको यस गीतले प्रेम, आकर्षण र आत्मविश्वासलाई केन्द्रमा राख्दै दर्शकमाझ नयाँ स्वाद प्रस्तुत गर्ने प्रयास गरेको छ।
गीतमा मनोज खड्काको शब्द, कल्याण सिंहको संगीत तथा गोपाल रसाइलीको सङ्गीत संयोजन रहेको छ। गीतमा इन्दिरा जोशीसँगै गायक रामकृष्ण ढकालको स्वर पनि सुन्न सकिन्छ, जसले गीतलाई थप विशेष बनाएको छ।
सार्वजनिक गरिएको म्युजिक भिडियोमा आश्मा विश्वकर्मा मुख्य भूमिकामा देखिएकी छन्। उनले ग्ल्यामरयुक्त तथा ऊर्जावान प्रस्तुति दिएकी छन् भने अभिनेता रोशन विश्वकर्माले उनको साथ दिएका छन्। भिडियोको निर्देशन पनि रोशन विश्वकर्माले नै गरेका हुन्।
भिडियोमा उत्सव दाहालको छायांकन, दिनसन शाहको सम्पादन तथा रङ संयोजन रहेको छ। गीतका निर्माता तथा गीतकार मनोज खड्काले यस परियोजनामार्फत आधुनिक शैलीको सांगीतिक प्रस्तुति दर्शकमाझ ल्याउने प्रयास गरेका छन्।
मनोज खड्का यसअघि पनि विभिन्न शैलीका गीतमार्फत श्रोतामाझ परिचित छन्। उनका सिर्जनामध्ये ‘गजल उनकै गीत उनकै’, ‘गाउँघरले सोध्यो परदेशीलाई’, ‘तेजस्वी अप्सरा’ र ‘तिमी जे बन उदाहरण बन’ लगायतका गीतले दर्शक–श्रोताबाट राम्रो प्रतिक्रिया पाएका थिए।
नवीन गीत ‘सेन्सेसन’ अहिले **‘ट्रिपल प्रोडक्सन हाउस’**को आधिकारिक युट्युब च्यानलमार्फत सार्वजनिक गरिएको छ। गीत सार्वजनिक भएसँगै सामाजिक सञ्जालमा यसको भिडियो र प्रस्तुतिबारे दर्शक–श्रोताबीच विभिन्न प्रतिक्रिया आउने क्रम जारी छ।
