शिक्षा र खेलकुदमा २ खर्बभन्दा बढी बजेट, गत वर्षभन्दा ७ अर्ब वृद्धि

काठमाडौं — आगामी आर्थिक वर्ष २०८३/८४ का लागि शिक्षा तथा खेलकुद क्षेत्रमा कुल २ खर्ब १८ अर्ब ३० करोड ५० लाख रुपैयाँ बजेट प्रस्ताव गरिएको छ।

शिक्षा तथा खेलकुद मन्त्री सस्मित पोखरेलका अनुसार प्रतिशतका हिसाबले केही घटेको देखिए पनि रकमका आधारमा भने गत वर्षको तुलनामा करिब ७ अर्ब रुपैयाँ बढी बजेट विनियोजन गरिएको हो।

मन्त्री पोखरेलले बजेटको ठूलो हिस्सा शिक्षक तथा कर्मचारीको तलब, भत्ता र पेन्सनमा खर्च हुने बताए। साथै, शिक्षण तथा खेलकुद क्षेत्रको सेवा प्रवाहलाई प्रभावकारी बनाउन स्थानीय तहमा समेत ठूलो रकम हस्तान्तरण गरिएको जानकारी दिए।

सरकारले शिक्षा र खेलकुद क्षेत्रको सुधार, पहुँच विस्तार तथा गुणस्तर वृद्धिलाई प्राथमिकतामा राख्दै बजेट विनियोजन गरेको जनाएको छ।