झापा । घरेलु तथा साना उद्योग कार्यालय झापाले आर्थिक वर्ष २०८२/८३ मा उद्योग दर्ता, नवीकरण तथा विभिन्न प्रशासनिक सेवामार्फत रु दुई करोड ४१ लाख ६१ हजार १५० राजस्व सङ्कलन गरेको जनाएको छ। कार्यालयका अनुसार उद्योग दर्ताको क्रम बढ्दै जाँदा राजस्व सङ्कलनमा पनि उल्लेखनीय वृद्धि भएको हो।
कार्यालयकी सूचना अधिकारी जानकी भट्टराईका अनुसार समीक्षा अवधिमा ५८६ वटा नयाँ घरेलु तथा साना उद्योग दर्ता भएका छन्। तीमध्ये सेवामूलक उद्योगको संख्या सबैभन्दा बढी रहेको छ। तथ्याङ्कअनुसार ३०२ सेवामूलक, १४७ उत्पादनमूलक, १३३ कृषि तथा वनजन्य, ३ सूचना प्रविधिसम्बन्धी र १ ऊर्जामूलक उद्योग दर्ता भएका छन्।
कार्यालयले उपलब्ध गराएको विवरणअनुसार कुल राजस्वमध्ये सबैभन्दा ठूलो हिस्सा प्रशासनिक सेवा शुल्कबाट प्राप्त भएको छ। यस शीर्षकबाट रु एक करोड ९८ लाख १४ हजार ५० सङ्कलन गरिएको छ। त्यसैगरी व्यवसाय दर्ता तथा रजिस्ट्रेशन दस्तुरबाट रु ४२ लाख ८२ हजार १०० र सरकारी सम्पत्ति बिक्रीबाट रु ६५ हजार राजस्व प्राप्त भएको कार्यालयले जनाएको छ।
कार्यालयका अनुसार जिल्लामा उद्यमशीलता विस्तार, स्वरोजगारको अवसर वृद्धि तथा स्थानीय उत्पादन र सेवाको विकाससँगै नयाँ उद्योग दर्ता गर्नेको संख्या क्रमशः बढिरहेको छ। विशेषगरी सेवामूलक तथा उत्पादनमूलक क्षेत्रमा उद्यमीहरूको आकर्षण देखिएको कार्यालयको विश्लेषण छ।
घरेलु तथा साना उद्योगहरूको विस्तारले स्थानीय अर्थतन्त्रलाई चलायमान बनाउनुका साथै रोजगारी सिर्जना, उत्पादन वृद्धि र सरकारी राजस्व सङ्कलनमा समेत सकारात्मक योगदान पुर्याइरहेको सम्बन्धित कार्यालयले जनाएको छ।
