इलाम । जिल्लामा सञ्चालन भएका स्वास्थ्यसम्बन्धी कार्यक्रमको प्रगति र कार्यसम्पादन मूल्याङ्कनमा इलामका तीन स्थानीय तह उत्कृष्ट ठहरिएका छन्।
स्वास्थ्य कार्यालय इलाममा साउन २४ र २५ गते सम्पन्न आर्थिक वर्ष २०८२/८३ को जिल्लास्तरीय स्वास्थ्य कार्यक्रम समीक्षामा चुलाचुली गाउँपालिका, रोङ गाउँपालिका र सूर्योदय नगरपालिका संयुक्त रूपमा पहिलो स्थानमा रहेका हुन्।
कार्यक्रमअन्तर्गत गरिएको मूल्याङ्कनमा तीनवटै स्थानीय तहले समान ८३ अंक प्राप्त गरेका छन्। स्वास्थ्य क्षेत्रमा सञ्चालन गरिएका विभिन्न कार्यक्रमको प्रगति, उपलब्धि तथा कार्यसम्पादनका आधारमा स्थानीय तहहरूको मूल्याङ्कन गरिएको जनाइएको छ।
मूल्याङ्कनको नतिजाअनुसार इलाम नगरपालिका ८२ अंकसहित दोस्रो स्थानमा रहेको छ। त्यस्तै माई नगरपालिका ८१ अंक प्राप्त गर्दै तेस्रो स्थानमा परेको छ।
अन्य स्थानीय तहमध्ये देउमाई नगरपालिकाले ७९ अंक प्राप्त गरेको छ। माईजोगमाई गाउँपालिका र सन्दकपुर गाउँपालिकाले समान ७८ अंक हासिल गरेका छन्।
त्यसैगरी फाकफोकथुम गाउँपालिकाले ७५ अंक तथा माङ्सेबुङ गाउँपालिकाले ७२ अंक प्राप्त गरेको मूल्याङ्कन विवरणमा उल्लेख छ।
जिल्लास्तरीय स्वास्थ्य कार्यक्रम समीक्षामार्फत स्थानीय तहमा सञ्चालन भइरहेका स्वास्थ्य कार्यक्रमको अवस्था, प्रगति र उपलब्धिको समीक्षा गरिएको स्वास्थ्य कार्यालयले जनाएको छ। यसबाट कार्यक्रम कार्यान्वयनका क्रममा देखिएका उपलब्धि तथा सुधार गर्नुपर्ने पक्ष पहिचान गर्न सहयोग पुग्ने जनाइएको छ।
स्वास्थ्य सेवाको प्रभावकारिता बढाउन स्थानीय तहमा सञ्चालित कार्यक्रमको नियमित समीक्षा तथा मूल्याङ्कन महत्वपूर्ण हुने स्वास्थ्य क्षेत्रका अधिकारीहरूको भनाइ छ। समीक्षा कार्यक्रमले आगामी दिनमा स्वास्थ्यसम्बन्धी योजना तथा कार्यक्रमलाई थप प्रभावकारी बनाउन आवश्यक आधारसमेत तयार गर्ने अपेक्षा गरिएको छ।
जिल्लाका स्थानीय तहबीच स्वास्थ्य कार्यक्रमको कार्यसम्पादन तुलना गर्दा प्राप्त नतिजाले कुन क्षेत्रमा राम्रो प्रगति भइरहेको छ र कहाँ सुधारको आवश्यकता छ भन्ने विषय पहिचान गर्न सहयोग पुग्ने बताइएको छ।
