इलाम । रेबिज रोगको जोखिम न्यूनीकरण गर्ने उद्देश्यले इलाम नगरपालिकाका विभिन्न क्षेत्रमा कुकुरलाई रेबिजविरुद्धको खोप लगाइएको छ। नगरपालिकाको वडा नम्बर १ अन्तर्गतका विभिन्न बस्ती तथा बजार क्षेत्रमा सञ्चालन गरिएको अभियानमा १५० भन्दा बढी कुकुरलाई खोप दिइएको जनाइएको छ।
रेबिज मानिस तथा पशु दुवैका लागि जोखिमपूर्ण रोग भएकाले यसको संक्रमण रोकथामका लागि कुकुरलाई समयमै खोप लगाउनु आवश्यक मानिन्छ। यही उद्देश्यले त्रिवेणी बजार, गैरी, सीटीईभीटी क्षेत्र, नेपालटार बजार, छाछापुरलगायतका स्थानमा खोप अभियान सञ्चालन गरिएको हो।
अभियानअन्तर्गत विभिन्न स्थानमा समय तालिका बनाएर कुकुरलाई खोप दिइएको थियो। बिहान १० बजे सुकिलुम्बा टोलबाट सुरु भएको खोप कार्यक्रम चतुरे मोड हुँदै जनता आधारभूत विद्यालय आसपासमा सञ्चालन गरिएको थियो।
त्यसैगरी दिउँसो पण्डितगाउँको रिमलडाँडा तथा गोलाई क्षेत्रमा पनि कुकुरलाई रेबिजविरुद्धको खोप लगाइएको थियो। स्थानीय क्षेत्रमा रहेका घरपालुवा तथा अन्य कुकुरलाई समेटेर खोप सेवा उपलब्ध गराइएको जनाइएको छ।
खोप अभियानमा इलाम नगरपालिकाको भेटेरिनरी शाखाका प्रमुख सुभाष लिम्बू, पशुप्राविधिक प्रकाश लुइँटेलसहितको टोली सहभागी भएको थियो। साङरुम्बाका भेटेरिनरी प्राविधिक तथा सीटीईभीटीमा अध्ययनरत विद्यार्थीहरूले समेत अभियानमा सहयोग गरेका थिए।
स्थानीयस्तरमा सञ्चालन हुने यस्ता खोप अभियानले रेबिज संक्रमणको सम्भावना घटाउन सहयोग पुग्ने अपेक्षा गरिएको छ। विशेषगरी कुकुरको टोकाइबाट मानिसमा रेबिज सर्न सक्ने भएकाले पशुलाई समयमै खोप लगाउनु रोग नियन्त्रणको महत्वपूर्ण उपाय मानिन्छ।
अभियान सफल बनाउन प्राविधिक, विद्यार्थी तथा स्थानीयवासीबाट प्राप्त सहयोगप्रति आयोजकले धन्यवाद व्यक्त गरेका छन्। साथै, घरपालुवा कुकुरलाई नियमित रूपमा रेबिजविरुद्धको खोप लगाउने तथा समुदायमा रोगसम्बन्धी आवश्यक जानकारी फैलाउने कार्यलाई निरन्तरता दिनुपर्नेमा जोड दिइएको छ।
रेबिजबाट मानिस र पशु दुवैलाई सुरक्षित राख्न पशुको स्वास्थ्यमा नियमित ध्यान दिनुका साथै कुकुरको टोकाइ वा शंकास्पद सम्पर्क भएको अवस्थामा तत्काल स्वास्थ्य तथा पशु स्वास्थ्यसम्बन्धी निकायसँग परामर्श लिन आवश्यक हुन्छ।
