रोङ गाउँपालिकाको रसुवा बाढीपीडितलाई ८.४९ लाख सहयोग
इलाम — इलामको रोङ गाउँपालिकाले रसुवामा आएको बाढीबाट प्रभावित नागरिकको राहत तथा पुनःस्थापनाका लागि आर्थिक सहयोग गर्ने निर्णय गरेको छ।
गाउँपालिकाले बाढीपीडितको राहत र पुनःस्थापनामा सहयोग पुर्याउने उद्देश्यले ८ लाख ४९ हजार १६६ रुपैयाँ उपलब्ध गराउने निर्णय गरेको हो। भदौ ११ गते बसेको गाउँपालिकाको आकस्मिक कार्यपालिका बैठकले उक्त रकम सहयोग गर्ने निर्णय गरेको जनाइएको छ।
रसुवामा आएको बाढीका कारण विभिन्न क्षेत्रमा ठूलो जनधनको क्षति भएको र प्रभावित परिवारहरू कठिन अवस्थामा रहेको भन्दै रोङ गाउँपालिकाले स्थानीय तहको तर्फबाट मानवीय सहयोग गर्ने निर्णय गरेको हो।
विपद्को समयमा प्रभावित नागरिकलाई राहत उपलब्ध गराउनुका साथै उनीहरूको पुनःस्थापनाका लागि समेत सहयोग आवश्यक रहेको गाउँपालिकाको निष्कर्ष छ। सोहीअनुसार गाउँपालिकाले आफ्नो तर्फबाट आर्थिक सहयोग उपलब्ध गराउने निर्णय गरेको जनाएको छ।
बैठकले प्राकृतिक विपद्का कारण समस्यामा परेका रसुवाका नागरिकप्रति ऐक्यबद्धता जनाउँदै राहत तथा पुनःस्थापनाका प्रयासमा सहयोग पुर्याउने प्रतिबद्धता व्यक्त गरेको छ।
यसैबीच, विपद्को कठिन परिस्थितिमा प्रभावित नागरिकलाई थप सहयोग गर्न सम्पूर्ण रोङवासीलाई समेत मानवीय सहयोगमा जुट्न गाउँपालिकाले आह्वान गरेको छ। विपद्मा परेका नागरिकको पीडामा स्थानीय तह र समुदायको साथ आवश्यक रहेको गाउँपालिकाको भनाइ छ।
